കൊല്ലം: അറുപത്തി രണ്ടാമത് സ്‌കൂൾ കലോത്സവത്തിന്റെ കിരീടം കണ്ണൂർ സ്വന്തമാക്കി. വൈകിട്ട് അഞ്ചിന് ആശ്രാമം മൈതാനത്തിലെ പ്രധാനവേദിയിൽ ആരംഭിച്ച സമാപന സമ്മേളനത്തിൽ മെഗാസ്റ്റാർ മമ്മൂട്ടിയിൽ നിന്നും ജേതാക്കൾ സ്വർണ്ണക്കപ്പ് സ്വീകരിക്കും. മന്ത്രി കെ.എൻ.ബാലഗോപാലാണ് അദ്ധ്യക്ഷൻ. 952 പോയിന്റു നേടിയാണ് 23 വർഷങ്ങൾക്കു ശേഷം കണ്ണൂർ 117.5 പവൻ വരുന്ന സ്വർണക്കപ്പ് നാട്ടിലേക്ക് കൊണ്ടുപോകുന്നത്. കണ്ണൂരിന്റെ 4ാം കിരീനേട്ടമാണിത്. കോഴിക്കോട് (949 പോയിന്റ്) രണ്ടാം സ്ഥാനവും പാലക്കാട് (938 പോയിന്റ്) മൂന്നാം സ്ഥാനവും നേടി.

പാലക്കാട് ആലത്തൂർ ബിഎസ്എസ് ഗുരുകുലം ഹയർസെക്കൻഡറി സ്‌കൂൾ (249 പോയിന്റ്) ഒന്നാമതെത്തി. തിരുവനന്തപുരം വഴുതക്കാട് കാർമൽ ഹയർ സെക്കൻഡറി സ്‌കൂളാണ് (116 പോയിന്റ്) രണ്ടാം സ്ഥാനത്ത്.

വിവിധ വിഭാഗങ്ങളിലുള്ള 30 ട്രോഫികൾ വേദിയിൽ സമ്മാനിക്കും. സമ്മാനം വാങ്ങാൻ 20 കുട്ടികൾക്ക് മാത്രം പ്രധാന വേദിയിൽ പ്രവേശിക്കാം. ആഹ്ലാദം പങ്കിടാനും ഫോട്ടോ എടുക്കാനുമുള്ള സൗകര്യം സ്റ്റേജിന് താഴെ ഒരുക്കുന്നുണ്ട്. വിജയിച്ചവർക്കുള്ള ട്രോഫി ട്രോഫി കമ്മിറ്റി ഓഫീസ് വഴി വിതരണം ചെയ്യും. വിജയികൾക്കുള്ള സാമ്പത്തിക പ്രോത്സാഹനവും സർട്ടിഫിക്കറ്റും താമസിയാതെ നൽകും.

മറ്റു ജില്ലകളുടെ പോയിന്റു നില

തൃശൂർ 925
മലപ്പുറം 913
കൊല്ലം 910
എറണാകുളം 899
തിരുവനന്തപുരം 870
ആലപ്പുഴ 852
കാസർകോട് 846
കോട്ടയം 837
വയനാട് 818
പത്തനംതിട്ട 774
ഇടുക്കി 730