ലണ്ടൻ : ചെറുപ്പത്തിൽ പല തവണ ആത്മഹത്യ ചെയ്യാൻ തോന്നിയിട്ടുണ്ടെന്നും അമ്മ കരീമ നൽകിയ ഉപദേശങ്ങളാണ് ജീവിതത്തിലേക്ക് കൈപിടിച്ചുയർത്തിയതെന്നും സംഗീത സംവിധായകൻ എ.ആർ റഹ്മാൻ. അടുത്തിടെ ഓക്സ്ഫഡ് യൂണിയൻ ഡിബേ​റ്റിംഗ് സൊസൈ​റ്റിയിൽ മാനസികാരോഗ്യം, ആത്മീയത എന്നിവയെ കുറിച്ച് സംസാരിക്കവെയാണ് റഹ്മാന്റെ വെളിപ്പെടുത്തൽ.

തന്നെ ആത്മഹത്യ ചിന്തകൾ അലട്ടുന്നുണ്ടെന്ന് മനസിലാക്കിയ അമ്മ ഒരു ഉപദേശം നൽകി. ' നീ മറ്റുള്ളവർക്കുവേണ്ടി ജീവിക്കുമ്പോൾ നിനക്ക് അത്തരം തോന്നലുകൾ ഉണ്ടാകില്ല.' അമ്മ തനിക്ക് നൽകിയ ഏറ്റവും മനോഹരമായ ഉപദേശങ്ങളിലൊന്നാണ് അതെന്നും റഹ്മാൻ പറഞ്ഞു. സ്വാർത്ഥതയില്ലാതെ നിങ്ങൾ മ​റ്റുള്ളവർക്ക് വേണ്ടി ജീവിക്കുമ്പോൾ ജീവിതത്തിന് അർത്ഥമുണ്ടാകുന്നതായും എല്ലാവർക്കും ഇരുണ്ട സമയങ്ങളിലൂടെ കടന്നുപോകേണ്ടി വരുമെന്നും അദ്ദേഹം പറഞ്ഞു.