കാഠ്മണ്ഡു: നേപ്പാളിൽ രാപ്തി നദിയിലേക്ക് ബസ് മറിഞ്ഞ് രണ്ട് ഇന്ത്യക്കാർ അടക്കം 12 പേർ മരിച്ചു. 23 പേർക്ക് പരിക്കേ​റ്റു. ബീഹാർ സ്വദേശി യോഗേന്ദ്ര റാം (67), ഉത്തർ പ്രദേശ് സ്വദേശി മുനെ (31) എന്നിവരാണ് മരിച്ച ഇന്ത്യക്കാർ. പ്രാദേശിക സമയം, വെള്ളിയാഴ്ച അർദ്ധരാത്രിയോടെ ലുംബിനി പ്രവിശ്യയിലെ ഡാംഗ് ജില്ലയിൽ ഭാലുബാംഗിലുള്ള ഈസ്​റ്റ് - വെസ്​റ്റ് ഹൈവേയിലെ പാലത്തിൽ നിന്ന് ബസ് താഴേക്ക് പതിക്കുകയായിരുന്നു. നേപ്പാൾ ഗഞ്ചിൽ നിന്ന് കാഠ്മണ്ഡുവിലേക്ക് പോവുകയായിരുന്നു ബസ്. അപകട കാരണം വ്യക്തമല്ല. ബസ് ഡ്രൈവറെ പൊലീസ് കസ്റ്റഡിയിലെടുത്തു.