ബൊഗോട്ട: വടക്കുപടിഞ്ഞാറൻ കൊളംബിയയിൽ കനത്ത മഴയെ തുടർന്നുണ്ടായ മണ്ണിടിച്ചിലിൽ 23 പേർ കൊല്ലപ്പെട്ടു. 35 പേർക്ക് പരിക്കേറ്റു. നിരവധി പേരെ കാണാതായെന്ന് കരുതുന്നു. പസഫിക് പ്രവിശ്യയായ ചോക്കോയിലെ ക്വിബ്‌ഡോ, മെഡെലിൻ നഗരങ്ങളെ ബന്ധിപ്പിക്കുന്ന തിരക്കേറിയ ഹൈവേയിലേക്ക് പ്രാദേശിക സമയം വെള്ളിയാഴ്ച ഉച്ചതിരിഞ്ഞാണ് മണ്ണിടിച്ചിലുണ്ടായത്.

റോഡിലെ നിരവധി വാഹനങ്ങൾ പൂർണമായും ചെളിയിൽ മുങ്ങി. രക്ഷാപ്രവർത്തനം തുടരുകയാണെന്നും മരണസംഖ്യ ഉയരുമെന്നും അധികൃതർ അറിയിച്ചു. അപകടത്തിന്റെ പശ്ചാത്തലത്തിൽ മേഖലയിലൂടെയുള്ള റോഡ് ഗതാഗതം സ്തംഭിച്ചു.