ക്വലാലംപുർ: ഇന്ത്യയുടെ സാത്വിക്‌സായ്‌രാജ് - ചിരാഗ് ഷെട്ടി സഖ്യത്തിന് മലേഷ്യൻ ഓപ്പൺ സൂപ്പർ 1000 ബാഡ്മിന്റൺ ചാമ്പ്യൻഷിപ്പിന്റെ പുരുഷ ഡബിൾസ് ഫൈനലിൽ തോൽവി. ഞായറാഴ്ച നടന്ന ഫൈനലിൽ ലോക ഒന്നാം നമ്പർ സഖ്യമായ ചൈനയുടെ ലിയാംഗ് വെയ് കെംഗ് - വാംഗ് ചാംഗ് ജോഡിയോടായിരുന്നു ഇന്ത്യൻ സഖ്യത്തിന്റെ തോൽവി. ആദ്യഗെയിം സ്വന്തമാക്കിയ ശേഷമാണ് ഇന്ത്യന്‍ സഖ്യം മത്സരം കൈവിട്ടത്. സ്കോർ : 21-9 ,18-21,17-21.

രണ്ടാം ഗെയിമിൽ തിരിച്ചടിച്ച ചൈനീസ് സഖ്യം 21-18 എന്ന സ്‌കോറിനാണ് ഗെയിം സ്വന്തമാക്കിയത്. മൂന്നാം ഗെയിമിൽ ഇന്ത്യൻ സഖ്യം ലീഡ് നേടിയെങ്കിലും തിരിച്ചടിച്ച ചൈനീസ് സഖ്യം 21-17 എന്ന സ്‌കോറിന് ചാമ്പ്യൻഷിപ്പ് സ്വന്തമാക്കുകയായിരുന്നു. ചൈനീസ് സഖ്യത്തോട് സാത്വിക്‌ - ചിരാഗ് സഖ്യം ഇത് നാലാം തവണയാണ് പരാജയപ്പെടുന്നത്. സെമിയിൽ കൊറിയയുടെ ലോകചാമ്പ്യന്മാരായ സിയോ സ്യൂംഗ് ജെയ് -കിംഗ് മിൻ ഹ്യുക്ദിഷ്ദ് സഖ്യത്തെ നേരിട്ടുള്ള ഗെയിമുകൾക്ക് പരാജയപ്പെടുത്തിയാണ് ഇന്ത്യൻ സഖ്യം ഫൈനലിൽ പ്രവേശിച്ചത്.