ഇന്നത്തെ കാലത്ത് ഷുഗർ, ബിപി, കൊളസ്‌ട്രോൾ രോഗികളില്ലാത്ത വീടുകൾ കുറവായിരിക്കും. അതിനാൽ തന്നെ മിക്കവാറും വീടുകളിൽ അത്താഴം ഗോതമ്പ് കൊണ്ടുള്ള വിഭവങ്ങളായിരിക്കും. ഇക്കാരണത്താൽ ഇൻസ്റ്റന്റ് ചപ്പാത്തിയെ ആശ്രയിക്കുന്നവർ ഇന്ന് ഏറെയാണ്. മാത്രമല്ല തിരക്ക് പിടിച്ച ജീവിതത്തിൽ മാവ് കുഴച്ച് പരത്തിയെടുത്ത് ചപ്പാത്തി ഉണ്ടാക്കാനും മിക്കവർക്കും സമയം ലഭിക്കുകയില്ല. ഇക്കാരണങ്ങളാൽ മിക്ക വീടുകളിലും ഇൻസ്റ്റന്റ് ചപ്പാത്തി പതിവ് വിഭവമായിരിക്കും. എന്നാൽ വീട്ടിൽ പൊടിക്കുന്ന മാവ് ഉപയോഗിച്ച് ഉണ്ടാക്കുന്ന ചപ്പാത്തിയേക്കാളും കടയിൽ നിന്ന് മാവ് വാങ്ങിയുണ്ടാക്കുന്ന ചപ്പാത്തിയേക്കാളും ഇൻസ്റ്റന്റ് ചപ്പാത്തിക്ക് ഏറെ ദോഷഫലങ്ങളുണ്ട്.
അന്നന്ന് ഉണ്ടാക്കുന്ന 'പച്ച' ചപ്പാത്തിയാകില്ല കടകളിൽ കാണുന്നത്. ദിവസങ്ങൾക്ക് മുൻപ് മാവ് കുഴച്ച് പരത്തിയവയായിരിക്കും പ്ളാസ്റ്റിക് പാക്കറ്റുകളിലാക്കി കടകളിൽ വച്ചിരിക്കുന്നത്. ഇത് ദിവസങ്ങളോളം കേടാകാതിരിക്കാൻ ചേർക്കുന്ന പ്രിസർവേറ്റീവുകൾ ആരോഗ്യത്തിന് വളരെ ഹാനികരമാണ്. പ്രിസർവേറ്റീവിനൊപ്പം മാവിൽ ചേർക്കുന്ന മറ്റ് രണ്ട് പദാർത്ഥങ്ങളും വലിയ അപകടകാരികളാണ്. ബേക്കിംഗ് സോഡ, വനസ്‌പതി പോലുള്ള ഹൈഡ്രോജനേറ്റഡ് ഫാറ്റ് എന്നിവ മാവിൽ ചേർക്കുമെങ്കിലും ഇവ പാക്കറ്റിൽ അടയാളപ്പെടുത്താറില്ല. പാക്കറ്റ് ചപ്പാത്തി പൊങ്ങിവരുന്നതിന് കാരണം ഇവ രണ്ടുമാണ്.
ഹാഫ് കുക്ക്‌ഡ് ചപ്പാത്തിയിൽ ഫുഡ് സേഫ്റ്റി ആന്റ് സ്റ്റാൻഡേർഡ് ആക്‌ട് അനുവദിക്കുന്ന പ്രിസർവേറ്റീവ് സോർബിക് ആസിഡ് ആണ്. ചപ്പാത്തി പരത്തി നാല് ഡിഗ്രി സെന്റിഗ്രേഡിൽ ഫ്രിഡ്‌ജിൽ സൂക്ഷിച്ചാൽ ഇത് 15 ദിവസം വരെ കേടാകാതെയിരിക്കും. പൊതിഞ്ഞ് വേണം ഇത് ഫ്രിഡ്‌ജിൽ സൂക്ഷിക്കേണ്ടത്. കാൽസ്യം പ്രൊപ്പണേറ്റ് എന്ന പ്രിസർവേറ്റീവ് അൾസറിനും ദഹനസംബന്ധമായ പ്രശ്‌നങ്ങൾക്കുവരെ കാരണമാകാം. അതിനാൽ പാക്കറ്റ് ചപ്പാത്തി വാങ്ങുമ്പോൾ അതിൽ അടങ്ങിയിട്ടുള്ള പ്രിസർവേറ്റീവുകൾ ഏതെന്ന് വായിച്ച് മനസിലാക്കേണ്ടത് വളരെ പ്രധാനമാണ്.