മുംബയ്: രാമക്ഷേത്ര പ്രതിഷ്ഠ നടക്കാനിരിക്കെ അയോദ്ധ്യയിൽ ഭൂമി സ്വന്തമാക്കി ബോളിവുഡ് താരം അമിതാഭ് ബച്ചൻ. സെവൻ സ്റ്റാർ എൻക്ലേവിൽ സ്ഥലം വാങ്ങിയെന്നാണ് റിപ്പോർട്ട്. മുംബയ് ആസ്ഥാനമായി പ്രവർത്തിക്കുന്ന ഹൗസ് ഒഫ് അഭിനന്ദൻ ലോധയിൽ നിന്ന് 14.5 കോടി രൂപയ്ക്ക് 10,000 ചതുരശ്ര അടി സ്ഥലം വാങ്ങിയെന്നാണ് റിപ്പോർട്ട്.

എന്നാൽ കൃത്യമായ വിവരം കമ്പനി പുറത്തുവിട്ടിട്ടില്ല. അയോദ്ധ്യക്ക് തന്റെ ഹൃദയത്തിൽ പ്രത്യേക സ്ഥാനമുണ്ടെന്ന് ബച്ചൻ പറഞ്ഞു. അവിടുത്തെ ആത്മീയതയും സംസ്‌കാര സമ്പന്നതയും അതിർത്തിക്കപ്പുറം വൈകാരികമായ ബന്ധം സൃഷ്ടിക്കുന്നു. അയോദ്ധ്യയുടെ ആത്മാവിലേക്കുള്ള യാത്രയുടെ തുടക്കമാണിത്.

ആഗോള ആത്മീയ കേന്ദ്രത്തിൽ ഒരു വീട് നിർമ്മിക്കാൻ ആഗ്രഹിച്ചെന്നും അതിനായി കാത്തിരിക്കുന്നെന്നും ബച്ചൻ പറഞ്ഞു. അയോദ്ധ്യയിൽ നിന്ന് നാല് മണിക്കൂർ മാത്രമുള്ള പ്രയാഗ്‌രാജ് ആണ് ബച്ചന്റെ ജന്മസ്ഥലം.