കാസർകോട് : മുഖ്യമന്ത്രിയോടൊപ്പം ഡൽഹി സമരത്തിൽ പാർട്ടി പങ്കെടുക്കില്ലെന്നും യു. ഡി എഫ് പങ്കെടുക്കരുതെന്നാണ് ആർ.എസ് .പി യുടെ അഭിപ്രായമെന്നും ആർ.എസ്.പി കേന്ദ്ര സെക്രട്ടറിയേറ്റ് അംഗം എൻ.കെ.പ്രേമചന്ദ്രൻ എം.പി പറഞ്ഞു. ആർ.വൈ.എഫ് സംസ്ഥാന കമ്മിറ്റി കാസർകോട് നിന്ന് ആരംഭിച്ച കേരള സൈക്കിൾ റൈഡ് ഉദ്ഘാടനം ചെയ്യുകയായിരുന്നു അദ്ദേഹം.

യു.ഡി.എഫ് സ്വന്തം നിലയിൽ കേന്ദ്ര സർക്കാരിനെതിരെ സമര രംഗത്തുണ്ട്. കൂടുതൽ ശക്തമായ സമരവുമായി രംഗത്തിറങ്ങണം. കേന്ദ്രസർക്കാരിന്റെ പിന്തുണ ഒന്നു കൊണ്ടു മാത്രമാണ് പിണറായി സർക്കാർ നിൽക്കുന്നത്. അധികാര തിമിരം ബാധിച്ച പിണറായി സർക്കാരിന് നൽകിയ ഏറ്റവും വലിയ വാക്കാണ് എം.ടിയുടേത്. നാണവും മാനവുമില്ലാത്ത ഒരു മുഖ്യമന്ത്രിയാണിത്. കണ്ണേ കരളേ വി എസ്സേ എന്ന് മുദ്രാവാക്യം വിളിച്ചതിന് സി.പി.എമ്മിൽ നടപടി നേരിട്ടവർ ഉണ്ട്. എന്നിട്ട് പിണറായിയെ പുകഴ്ത്താൻ മത്സരിക്കുകയാണ്. ത്രിപുരയും ബംഗാളും കേരളത്തിൽ ആവർത്തിക്കും. അയോദ്ധ്യയിൽ വിശ്വാസം മുന്നിൽ നിർത്തി ബി. ജെ. പി രാഷ്ട്രീയം കളിക്കുന്നത് അപകടകരമാണെന്നും പ്രേമചന്ദ്രൻ പറഞ്ഞു.

സംഘാടക സമിതി ചെയർമാൻ ഹരീഷ് ബി നമ്പ്യാർ അദ്ധ്യക്ഷത വഹിച്ചു. കെ.ജയകുമാർ , കെ.എസ്.സനൽ കുമാർ, പി.ജി.പ്രസന്നകുമാർ , ഇടവനശ്ശേരി സുരേന്ദ്രൻ ,എം. എസ്. ഷൗക്കത്ത് , ജാഥാ ക്യാപ്ടൻമാരായ ഉല്ലാസ് കോവൂർ, അഡ്വ. വിഷ്ണു മോഹൻ , ഷിബു കോരാണി, പുലത്തറ നൗഷാദ്, കുളക്കട പ്രസന്നൻ , ശ്യാം പള്ളിശ്ശേരിക്കൽ , കിരൺ ജെ നാരായണൻ , സി.എം ഷെറീഫ്, കാട്ടൂർ കൃഷ്ണകുമാർ , ഷംസുദ്ദീൻ, ദീപാ മണി , റിജോ ചെറുവത്തൂർ, നാസിം ചാനടുക്കം കരിവെള്ളൂർ വിജയൻ തുടങ്ങിയവർ പ്രസംഗിച്ചു.