ഫെബ്രുവരി 5ന് ചിത്രീകരണം

ബേസിൽ ജോസഫ് നായകനായി പ്രശസ്ത കലാസംവിധായകൻ ജ്യോതിഷ് ശങ്കർ ആദ്യമായി സംവിധാനം ചെയ്യുന്ന നാലഞ്ചു ചെറുപ്പക്കാർ എന്ന ചിത്രത്തിന്റെ ചിത്രീകരണം ഫെബ്രുവരി 5ന് കൊല്ലത്ത് ആരംഭിക്കും.നായിക പുതുമുഖമാണ്. നിരവധി പുതുമുഖങ്ങൾ അണിനിരക്കുന്ന ചിത്രം ജി.ആർ. ഇന്ദുഗോപന്റെ നാലഞ്ചു ചെറുപ്പക്കാർ എന്ന നോവലിന്റെ ചലച്ചിത്രാവിഷ്‌കാരമാണ്. ഇന്ദുഗോപൻ തന്നെ തിരക്കഥയും സംഭാഷണവും ഒരുക്കുന്നു. വിനായക ഫിലിംസിന്റെ ബാനറിൽ അജിത് വിനായക ആണ് നിർമ്മാണം. വർഷങ്ങൾക്കുമുൻപ് കൊല്ലത്ത് ഒരു സംഘം ഒരുമിച്ച് മോന്തായം എന്ന സാംസ്കാരിക കൂട്ടായ്മയ്ക്ക് രൂപം നൽകിയിരുന്നു. ഇതിന്റെ ഭാഗമായിരുന്ന ജ്യോതിഷ് ശങ്കർ ഈ പരിസരത്തു നിന്നാണ് ആദ്യ സംവിധാന സംരംഭം ഒരുക്കുന്നതെന്ന പ്രത്യേകത കൂടിയുണ്ട്. സാലു കെ. ജോർജിന്റെ ശിഷ്യനായി വെള്ളിത്തിരയിൽ എത്തുന്ന ജ്യോതിഷ് ശങ്ക‌ർ അന്താരാഷ്ട്ര ശ്രദ്ധ നേടിയ ആദാമിന്റെ മകൻ അബു എന്ന ചിത്രത്തിലൂടെയാണ് സ്വതന്ത്ര കലാസംവിധായകനാവുന്നത്. പത്തേമാരി, കാർബൺ, തൊണ്ടിമുതലും ദൃക്‌സാക്ഷിയും, കുമ്പളങ്ങി നൈറ്റ്സ്, മലയൻകുഞ്ഞ് എന്നിവയാണ് ശ്രദ്ധേയ ചിത്രങ്ങൾ. കുമ്പളങ്ങി നൈറ്റ്സ് , ആൻഡ്രോയ്ഡ് കുഞ്ഞപ്പൻ ,ന്നാ, താൻ കേസ് കൊട് എന്നീ ചിത്രങ്ങളിലൂടെ രണ്ടു തവണ സംസ്ഥാന അംഗീകാരവും തേടി എത്തിയിരുന്നു. ഏറെ നാളായി സംവിധായകനായി മാറാനുള്ള ഒരുക്കത്തിലായിരുന്നു .