അയോദ്ധ്യയിൽ പ്രാണപ്രതിഷ്ഠ ചടങ്ങിന് പിന്നാലെ നടി രേവതി, നിത്യ മേനൻ എന്നിവർ സോഷ്യൽ മീഡിയയിലൂടെ നിലപാട് വ്യക്തമാക്കി രംഗത്തെത്തിയിരുന്നു. ഇപ്പോഴിതാ രാമന്റെയും സീതയുടെയും ചിത്രങ്ങൾ പങ്കുവച്ച് രംഗത്തെത്തിയിരിക്കുകയാണ് നടി സംയുക്ത മേനോൻ. ബ്രിട്ടീഷ് കവി ബെൻ ഒക്രിയുടെ കവിത അടിക്കുറിപ്പമായി പങ്കുവച്ചാണ് നടി സംയുക്ത മേനോൻ ചിത്രങ്ങൾ പങ്കുവച്ചത്.

'സൃഷ്ടിക്കാനും മറികടക്കാനും സഹിക്കാനും രൂപാന്തരപ്പെടാനും സ്‌നേഹിക്കാനും നമ്മുടെ കഷ്ടപ്പാടുകളേക്കാൾ വലുതാക്കാനുമുള്ള കഴിവാണ് നമ്മളെ സംബന്ധിച്ചിടത്തോളം ഏറ്റവും വലിയ കരുത്ത്'- സംയുക്ത സോഷ്യൽ മീഡിയയിൽ കുറിച്ചു. പ്രാണ പ്രതിഷ്ഠാ ദിവസം നിലവിളക്ക് തെളിയിച്ചതിന്റെ ചിത്രവും സംയുക്ത പങ്കുവച്ചിരുന്നു.

അതേസമയം, അയോദ്ധ്യരാമപ്രതിഷ്ഠാ ദിനം ഒരിക്കലും മറക്കാൻ കഴിയാത്ത അനുഭവമായിരുന്നെന്നാണ് നടി രേവതി പറഞ്ഞത്. നടിമാരായ ദിവ്യ ഉണ്ണി, ശിൽപ ഷെട്ടി എന്നിവരും രാംലല്ലയുടെ ചിത്രം പങ്കുവച്ച് നിലപാട് വ്യക്തമാക്കിയിരുന്നു. എന്നാൽ നടിമാരായ പാർവതി തിരുവോത്ത്, റിമ കല്ലിങ്കൽ, ദിവ്യ പ്രഭ, സംവിധായകരായ കമൽ, ആഷിഖ് അബു, ജിയോ ബേബി ജോൺ എന്നിവർ ഭരണഘടനയുടെ അമുഖം പങ്കുവച്ച് അയോദ്ധ്യ വിഷയത്തിൽ നിലപാട് വ്യക്തമാക്കി രംഗത്തെത്തിയിരുന്നു.

നമ്മുടെ ഇന്ത്യ എന്ന അടിക്കുറിപ്പോടെ കൂപ്പ് കൈയുടെ ചിഹ്നമാണ് പാർവതി ഭരണഘടനയുടെ ചിത്രത്തിനൊപ്പം പങ്കുവച്ചത്. ഇന്ത്യ, പരമാധികാര സോഷ്യലിസ്റ്റ് മതേതര ഡെമോക്രാറ്റിക് റിപ്പബ്ലിക് എന്ന അടിക്കുറിപ്പോടെയാണ് ആഷിഖ് അബു ചിത്രം പങ്കുവച്ചത്. 'നീതി, സ്വാതന്ത്ര്യം, സമത്വം, സഹോദര്യം' എന്ന അടിക്കുറിപ്പോടെയാണ് റിമ കല്ലിങ്കലിന്റെ പോസ്റ്റ്.