ന്യൂഡല്‍ഹി: വനിതാ ഐപിഎല്‍ (ഡബ്ല്യൂ.പി.എല്‍) രണ്ടാം സീസണ്‍ മത്സരങ്ങള്‍ ഫെബ്രുവരി 23ന് ആരംഭിക്കും. ബെംഗളൂരു ചിന്നസ്വാമി സ്റ്റേഡിയത്തില്‍ നടക്കുന്ന ഉദ്ഘാടന മത്സരത്തില്‍ നിലവിലെ ചാമ്പ്യന്മാരായ മുംബയ് ഇന്ത്യന്‍സും റണ്ണറപ്പുകളായ ഡല്‍ഹി ക്യാപ്പിറ്റല്‍സും തമ്മില്‍ ഏറ്റുമുട്ടും.
സീസണിലെ എല്ലാ മത്സരങ്ങളും ഡല്‍ഹി, ബെംഗളൂരു എന്നിവിടങ്ങളിലാണ് നടക്കുക. രാത്രി 7.30 ന് മത്സരം ആരംഭിക്കും. അഞ്ച് ടീമുകളില്‍ ആദ്യ സ്ഥാനത്ത് എത്തുന്ന ടീം നേരിട്ട് ഫൈനലിന് യോഗ്യത നേടും. രണ്ട് മൂന്ന് സ്ഥാനങ്ങളിലെത്തുന്ന ടീമുകള്‍ തമ്മില്‍ എലിമിനേറ്റര്‍ മത്സരമുണ്ടാകും. അതില്‍ വിജയിക്കുന്നവര്‍ രണ്ടാം ടീമായി കലാശപ്പോരിന് യോഗ്യത നേടും. ഫൈനല്‍ മാര്‍ച്ച് 17ന് നടക്കും.
ആകെ 22 മത്സരങ്ങളില്‍ ഒരു ടീമിന് എട്ട് മത്സരങ്ങള്‍ വീതമുണ്ടാകും. റോയല്‍ ചലഞ്ചേഴ്‌സ് ബാംഗ്ലൂര്‍, മുംബയ് ഇന്ത്യന്‍സ്, യുപി വാരിയേഴ്‌സ്, ഗുജറാത്ത് ജയന്റ്‌സ്, ഡല്‍ഹി ക്യാപ്പിറ്റല്‍സ് എന്നീ അഞ്ച് ടീമുകളാണ് ടൂര്‍ണമെന്റില്‍ പങ്കെടുക്കുക.