തൃശൂർ: ഓലപ്പടക്കം ബെെക്കിലേക്ക് വീണ് പൊട്ടിത്തെറിച്ച് ഉണ്ടായ തീപിടിത്തതിൽ യുവാവിന് ഗുരുതരമായി പൊള്ളലേറ്റു. ചാലക്കുടി പരിയാരം സ്വദേശി മൂലേങ്ങാട്ട് വീട്ടിൽ ശ്രീകാന്തിനാണ് പൊള്ളലേറ്റത്. ചാലകുടി പരിയാരം അങ്ങാടി കപ്പേളക്ക് സമീപം വെെകിട്ട് 5.45ഓടെയായിരുന്നു സംഭവം. ശ്രീകാന്ത് ഇറച്ചി വാങ്ങാൻ വരികയായിരുന്നു. ഈ സമയം റോഡിൽ വച്ച് ഓലപ്പടക്കം ബെെക്കിലേക്ക് വീണ് പൊട്ടിത്തെറിക്കുകയായിരുന്നു. സംഭവത്തിൽ ബെെക്കിന്റെ പെട്രോൾ ടാങ്ക് പൊട്ടിത്തെറിച്ചിരുന്നു. പരിസരത്തെ കടയിലേക്കും തീ പടർന്നു.

പരിയാരം സെന്റ് ജോർജ് പള്ളിയോടനുബന്ധിച്ച അമ്പ് തിരുനാൾ ആഘോഷത്തിനിടെയാണ് അപകടം ഉണ്ടായത്. അമ്പ് പെരുന്നാൾ റാസയ്ക്കിടെ പടക്കം പൊട്ടിച്ചിരുന്നു. അമ്പ് കടന്നുവരുന്ന വഴിയിലായിരുന്നു കോഴിയിറച്ച് വാങ്ങാൻ ശ്രീകാന്ത് എത്തിയത്. ചിക്കൻ ഓഡർ ചെയ്ത് ബെെക്കിൽ കാത്തിരിക്കുകയായിരുന്നു. അതിനിടെ കത്തിച്ച പടക്കം തെറിച്ച് ബെെക്കിൽ വീണ് തീ പിടിക്കുകയായിരുന്നു. ഗുരുതരമായി പൊള്ളലേറ്റ ശ്രീകാന്തിനെ തൃശൂരിലെ സ്വകാര്യ ആശുപത്രിയിലേക്ക് മാറ്റി. സംഭവത്തിൽ ചാലക്കുടി പൊലീസ് കേസെടുത്ത് അന്വേഷണം ആരംഭിച്ചു.