ഹൈദരാബാദ്: ഇന്ത്യയ്‌ക്കെതിരായ ഒന്നാം ടെസ്റ്റിൽ ഒലി പോപിന്റെ നേതൃത്വത്തിൽ ഇംഗ്ലണ്ട് പൊരുതുന്നു. മൂന്നാം ദിനം കളിയവസാനിക്കുമ്പോൾ ഇംഗ്ലണ്ട് രണ്ടാം ഇന്നിംഗ്‌സിൽ 316/6 എന്ന നിലയിലാണ്. ഇംഗ്ലണ്ടിനിപ്പോൾ 126 റൺസിന്റെ ലീഡുണ്ട്. സ്കോർ: ഇംഗ്ലണ്ട് 246/10,​ 316/6. ഇന്ത്യ 436/10. സെഞ്ച്വറി തികച്ച് ഒലി പോപ്പും (148)​,​ 16 റൺസുമായി റെഹാൻ അഹമ്മദുമാണ് ക്രീസിൽ.
190 റൺസിന്റെ ഒന്നാം ഇന്നിംഗ്‌സ് ലീഡ് വഴങ്ങി രണ്ടാം ഇന്നിംഗ്‌സിനിറങ്ങിയ ഇംഗ്ലണ്ടിന് ഓപ്പണർ സാക് ക്രോളിയുടെ (31)​ വിക്കറ്റാണ് ആദ്യം നഷ്ടമായത്. ടീം സ്കോർൽ വച്ച് ക്രോളിയെ അശ്വിൻ രോഹിതിന്റെ കൈയിൽ എത്തിച്ചു. മൂന്നാമനായെത്തിയ പോപ്പും മറ്റൊരു ഓപ്പണർ ബെൻ ഡെക്കറ്റും (47)​ ചേർന്ന് ഇംഗ്ലണ്ടിനെ നൂറ് കടത്തി. ഡെക്കറ്റിനെ ക്ലീൻ ബൗൾഡാക്കി ബുംറയാണ് കൂട്ടുകെട്ട് തകകർത്തത്. സൂപ്പർ ബാറ്റർ ജോ റൂട്ടിനെ (2)​ തന്റെ അടുത്ത ഓവറിൽ വിക്കറ്റിന് മുന്നിൽ കുടുക്കി ബുംറ ഇംഗ്ലണ്ടിന് ഇരട്ട പ്രഹരം നൽകി. ജോണി ബെയർസ്റ്റോയും (10)​,​ ബെൻ സ്റ്റോക്സും (6)​ വലിയ ചെറുത്ത് നിൽപ്പില്ലാതെ യഥാക്രമം ജഡേജയ്ക്കും അശ്വിനും വിക്കറ്റ് നൽകി മടങ്ങിയതോടെ 163/5 എന്ന നിലയിൽ പ്രതിസന്ധിയിൽ ആയി ഇംഗ്ലണ്ട്. തുടർന്ന് ക്രീസിലെത്തിയ ബെൻ ഫോക്സിനെ (34)​ കൂട്ടുപിടിച്ച് പോപ്പ് ഇംഗ്ലണ്ടിനെ പ്രതിസന്ധിയിൽ നിന്ന് കരകയറ്റി. ഇരുവരും ആറാം വിക്കറ്റിൽ 112 റൺസ് കൂട്ടിച്ചേർത്തു. ഫോക്സിനെ പുറത്താക്കി അക്ഷർ പട്ടേലാണ് കൂട്ടുകെട്ട് പൊളിച്ചത്. 81 പന്ത് നേരിട്ട ഫോക്സ് 2 ഫോറും നേടി. 208 പന്ത് നേരിട്ട് 17 ഫോറുൾപ്പെടെയാണ് 148 റൺസുമായി പോപ്പ് ബാറ്റിംഗ് തുടരുന്നത്.

രാവിലെ 421/7 എന്ന നിലയിൽ ഒന്നാം ഇന്നിംഗ്സ് പുനരാരംഭിച്ച ഇന്ത്യ 15 റൺസുകൂടി കൂട്ടിച്ചേർക്കുന്നതിനിടെ ഓൾഔട്ടായി. ഇന്ത്യയുടെ ടോപ് സ്കോററായ രവീന്ദ്ര ജഡേജയുടെ വിക്കറ്റാണ് ആദ്യം നഷ്ടമായത്. 180 പന്ത് നേരിട്ട് 7 ഫോറും 2 സിക്സും ഉൾപ്പെടെ 87 റൺസെടുത്ത ജഡേജയെ ജോ റൂട്ട് വിക്കറ്റിന് മുന്നിൽ കുടുക്കുകയായിരുന്നു. തൊട്ടടുത്ത പന്തിൽ ബുംറെയ (0)​ ഗോൾഡൻ ഡക്കാക്കി റൂട്ട് ഇന്ത്യയെ പ്രതിസന്ധിയിലാക്കി. അക്ഷർ പട്ടേലിനെ (44)​ ക്ലീൻ ബൗൾഡാക്കി റെഹാനാണ് ഇന്ത്യൻ ഇന്നിംഗ്സിന് തിരശീലയിട്ടത്. സിറാജ് (0)​ പുറത്താകാതെ നിന്നു.ഇഗ്ലണ്ടിനായി ജോ റൂട്ട് നാല് വിക്കറ്റ് വീഴ്ത്തി. റെഹാൻ,​ ഹാർട്ട്‌ലി എന്നിവർ രണ്ട് വിക്കറ്റ് വീതം വീഴ്ത്തി.