ചെറിയ പ്രായത്തിൽ തന്നെ ഒട്ടുമിക്കവരിലും കണ്ടുവരുന്ന ഒരു അവസ്ഥയാണ് കാഴ്ചക്കുറവ്. പാരമ്പര്യമായും ജീവിതശൈലിയിലുണ്ടാകുന്ന മാ​റ്റങ്ങളും നമ്മുടെ കാഴ്ചശക്തിയെ സാരമായി ബാധിക്കാറുണ്ട്. ദീർഘനേരമായുളള തലവേദനയും കണ്ണുകഴപ്പുമൊക്കൊ കാഴ്ചക്കുറവിന്റെ ലക്ഷണങ്ങളാകാം.

നേത്രരോഗ വിദഗ്ദ്ധന്റെ അടുത്തെത്തുന്നവരുടെ എണ്ണത്തിൽ മുൻപത്തെ അപേക്ഷിച്ച് വലിയ വർദ്ധനവ് ഉണ്ടായിട്ടുണ്ടെന്ന് വിദഗ്ദ്ധർ നടത്തിയ പഠനങ്ങളിൽ പറയുന്നു. എന്നാൽ ചില മുൻകരുതലുകൾ സ്വീകരിക്കുകയാണെങ്കിൽ ഈ അവസ്ഥ ഒരു പരിതി വരെ പരിഹരിക്കാം. കാഴ്ചശക്തി വർദ്ധിപ്പിക്കാനും സ്വാഭാവിക ശേഷി നിലനിർത്താനും പ്രായഭേദമന്യേ ചിലകാര്യങ്ങൾ വീട്ടിൽ തന്നെ പരീക്ഷിക്കാം. ഏതൊക്കെയെന്ന് നോക്കാം.

1. രാത്രി സമയങ്ങളിൽ മങ്ങിയ വെളിച്ചത്തിലിരുന്നുളള വായനയും പഠനവും ഒഴിവാക്കുക.
2. ദിവസവും രാവിടെ എഴുന്നേ​റ്റയുടൻ 20 മിനിട്ടിന്റെ ഇടവേളയിൽ ഇരുപത് അടി അകലെയുളള വസ്തുക്കളിലേക്ക് കാഴ്ച കേന്ദ്രീകരിക്കാൻ ശ്രമിക്കുക. ഇതിന്റെ 20-20-20 റൂൾ എന്നാണറിയപ്പെടുന്നത്.
3. ആറ് മാസത്തിൽ ഒരു തവണയെങ്കിലും കാഴ്ച ശക്തി പരിശോധിക്കാൻ വിദഗ്ദ്ധരെ സമീപിക്കുക.
4. ശരീരഭാരത്തിനനുസരിച്ച് ദിവസേന കൃത്യമായ അളവിൽ വെളളം കുടിക്കുക. ഇത് കാഴ്ചശക്തി വർദ്ധിപ്പിക്കുന്നതിനോടൊപ്പം പൂർണ ആരോഗ്യവാനായിരിക്കാനും സഹായിക്കും.
5. അമിതമായ പുകവലി കാഴ്ചശക്തിയെ സാരമായി ബാധിക്കാറുണ്ട്.അതിനാൽ പുകവലി ഒഴിവാക്കുക.
6. ദിവസവും കുറഞ്ഞ് ആറ് മുതൽ എട്ട് മണിക്കൂർ വരെയെങ്കിലും ഉറക്കത്തിനായി മാ​റ്റിവയ്ക്കുക.
7. കണ്ണിന് മതിയായ വിശ്രമം ആവശ്യമാണ്. ജോലി സംബന്ധമായ ആവശ്യങ്ങൾക്കുവേണ്ടി കൂടുതൽ സമയം കംപ്യൂട്ടറുകളുടെ സ്‌ക്രീനുകളിൽ നോക്കിയിരിക്കുന്നവരാണ് നിങ്ങളെങ്കിൽ കുറച്ച് കാര്യങ്ങൾ അനിവാര്യമായി ശ്രദ്ധിക്കേണ്ടതുണ്ട്. കണ്ണ് കുറച്ച് സമയമെങ്കിലും അടച്ചുവയ്ക്കുകയോ സ്‌ക്രിനിലേക്ക് നോക്കുന്നത് കുറച്ച് സമയമെങ്കിലും നിർത്തിവയ്ക്കുകയോ ചെയ്യാം.
8. കാഴ്ചശക്തി വർദ്ധിപ്പിക്കാൻ സഹായിക്കുന്ന പച്ചക്കറികളും പഴവർഗങ്ങളും ഭക്ഷണത്തിൽ ഉൾപ്പെടുത്താൻ ശ്രമിക്കുക. ഇലക്കറികളും ഒമേഗ 3 ഫാ​റ്റി ആസിഡടങ്ങിയ മത്സ്യങ്ങളും നട്ട്സുകളും കാഴ്ചശക്തി വർദ്ധിപ്പിക്കാൻ സഹായിക്കും.