മൂന്നാം സീസൺ ചെന്നൈയിൽ, ആദ്യ മത്സരത്തിൽ അഹമ്മദാബാദ് ഡിഫൻഡേഴ്‌സ് ചെന്നൈ ബ്ലിറ്റ്‌സിനെ നേരിടും

ചെന്നൈ: പ്രൈം വോളിബോൾ ലീഗ് മൂന്നാം സീസണിന്ഫെ ബ്രുവരി 15 ന് ചെന്നൈയിൽ തുടക്കമാകും. അഹമ്മദാബാദ് ഡിഫൻഡേഴ്‌സ്, ബെംഗളൂരു ടോർപ്പിഡോസ്, കാലിക്കറ്റ് ഹീറോസ്, ചെന്നൈ ബ്ലിറ്റ്‌സ്, ഡൽഹി തൂഫാൻസ്, ഹൈദരാബാദ് ബ്ലാക്ക് ഹോക്‌സ്, കൊച്ചി ബ്ലൂ സ്‌പൈക്കേഴ്‌സ്, കൊൽക്കത്ത തണ്ടർബോൾട്ട്‌സ്, മുംബൈ മെറ്റിയോഴ്‌സ് എന്നിങ്ങനെ ഒമ്പത് ഫ്രാഞ്ചൈസികളാണ് ലീഗിൽ മത്സരിക്കുക. മാർച്ച് 21നാണ് ഫൈനൽ.

ഉദ്ഘാടന ദിവസത്തെ ആദ്യ മത്സരത്തിൽ നിലവിലെ ചാമ്പ്യന്മാരായ അഹമ്മദാബാദ് ഡിഫൻഡേഴ്‌സ് ആതിഥേയരായ ചെന്നൈ ബ്ലിറ്റ്‌സിനെ നേരിടും. കഴിഞ്ഞ വർഷത്തെ റണ്ണേഴ്‌സ് അപ്പായ ബെംഗളൂരു ടോർപ്പിഡോസ് അന്ന് സീസൺ ഒന്നിലെ ജേതാക്കളായ കൊൽക്കത്ത തണ്ടർബോൾട്ട്‌സിനെ നേരിടും. ഫെബ്രുവരി 16ന് രാത്രി 8.30ന് കൊച്ചി ബ്ലൂ സ്‌പൈക്കേഴ്‌സ്-കാലിക്കറ്റ് ഹീറോസ് മത്സരം നടക്കും. ഇത്തവണ സൂപ്പർ 5 എന്ന ഫോർമാറ്റ് ഉൾപ്പെടുത്തിയിട്ടുണ്ട്. ലീഗ് ഘട്ടത്തിലെ മികച്ച അഞ്ച് ടീമുകളായിരിക്കും അവസാന മൂന്ന് ടീമുകളെ നിർണയിക്കാൻ റൗണ്ട് റോബിൻ ഫോർമാറ്റിൽ മത്സരിക്കുക. സൂപ്പർ 5ൽ ഒന്നാമതെത്തുന്ന ടീം ഫൈനലിലേക്ക് നേരിട്ട് യോഗ്യത നേടും, രണ്ടും മൂന്നും സ്ഥാനങ്ങൾ നേടുന്ന ടീമുകൾ മാർച്ച് 19ന് എലിമിനേറ്ററിൽ മത്സരിക്കും. എലിമിനേറ്ററിലെ വിജയിയാകും ഫൈനലിലെ രണ്ടാമത്തെ ടീം.

മത്സരങ്ങൾ സോണി സ്‌പോർട്‌സ് ടെൻ ചാനൽ നെറ്റ്‌വർക്കിൽ വൈകുന്നേരം 6.30 മുതൽ തത്സമയം കാണാം.