പാലക്കാട്: സംസ്ഥാന ടെക്നിക്കൽ ഹൈസ്കൂൾ കലോത്സവം ഇന്നുമുതൽ ചിറ്റൂരിൽ നടക്കും. രാവിലെ പത്തിന് ചിറ്റൂർ ടെക്നിക്കൽ ഹൈസ്കൂളിൽ മന്ത്രി ഡോ.ആർ.ബിന്ദു ഉദ്ഘാടനം ചെയ്യും. മന്ത്രി കെ.കൃഷ്ണൻകുട്ടി അദ്ധ്യക്ഷനാകും. മന്ത്രി കെ.രാജൻ മുഖ്യപ്രഭാഷണം നടത്തും.

രമ്യ ഹരിദാസ് എം.പി, എം.എൽ.എ.മാരായ കെ.ബാബു, ഷാഫി പറമ്പിൽ, പി.പി.സുമോദ്, ജില്ലാ പഞ്ചായത്ത് പ്രസിഡന്റ് കെ.ബിനുമോൾ, ബ്ലോക്ക് പ്രസിഡന്റ് എം.സുജാത, നഗരസഭാദ്ധ്യക്ഷ കെ.എൽ.കവിത എന്നിവർ പങ്കെടുക്കും. സമാപന സമ്മേളനം ആറിന് വൈകിട്ട് 4.30ന് മന്ത്രി കെ.രാധാകൃഷ്ണൻ ഉദ്ഘാടനം ചെയ്യും. എ.പ്രഭാകരൻ എം.എൽ.എ അദ്ധ്യക്ഷനാകും.

മത്സരങ്ങൾ ഒമ്പത് വേദികളിൽ

39 ടെക്നിക്കൽ ഹൈസ്കൂളും ഒമ്പത് ഐ.എച്ച്.ആർ.ഡിയും ഉൾപ്പെടെ 48 വിദ്യാഭ്യാസ സ്ഥാപനങ്ങളിൽ നിന്ന് 1500ഓളം വിദ്യാർത്ഥികളാണ് കലോത്സവത്തിൽ പങ്കെടുക്കുക. ഒമ്പത് വേദികളിലായി 48 മത്സര ഇനങ്ങൾ അരങ്ങേറും. തുഞ്ചൻപറമ്പ് എന്നറിയപ്പെടുന്ന കലാനഗരിയിൽ തസ്രാക്ക്, കൂമൻകാവ്, ചിതലിമല, ആത്മായനം, വഴിയമ്പലം, കഥാന്തരം, ഞാറ്റുപുര, ജാലകം, കളപ്പുര എന്നിങ്ങനെയാണ് വേദികൾക്ക് പേര് നൽകിയിരിക്കുന്നത്.
ജി.ബി.യു.പി.എസ് നല്ലേപ്പിള്ളി, ചിറ്റൂർ, തത്തമംഗലം ജി.യു.പി.എസ്, ഇ.എം.എസ് ഹാൾ, ജി.വി.എച്ച്.എസ്.എസ് ഗേൾസ്, ജി.എച്ച്.എസ്.എസ് ബോയ്സ് എന്നീ സ്‌കൂളുകളിലാണ് താമസ സൗകര്യം. ടെക്നിക്കൽ ഹൈസ്കൂളിനടുത്തുള്ള ഗ്രാൻഡ് ഓഡിറ്റോറിയത്തിലാണ് ഭക്ഷണം സജ്ജീകരിച്ചിട്ടുള്ളത്.