എലപ്പുള്ളി: ചിറ്റൂർ ബ്ലോക്ക് പഞ്ചായത്ത് പദ്ധതി പ്രോജക്ട് പ്രകാരം ധനസഹായം അനുവദിച്ച് പ്രവർത്തനം ആരംഭിച്ച ലക്ഷ്യ കയർ ഉത്പന്ന നിർമാണ യൂണിറ്റിന്റെ ഉദ്ഘാടനം കാരാങ്കോട് കോളനിയിൽ ബ്ലോക്ക് പ്രസിഡന്റ് എ.സുജാത നിർവഹിച്ചു.
പ്രധാനമായും ചവിട്ടി ഉല്പന്നങ്ങളാണ് നിർമ്മിക്കുന്നത്. നായാടി വിഭാഗം സ്ത്രീകളെ മുഖ്യധാരയിലേക്ക് എത്തിക്കുന്നതിന്റെ ഭാഗം കൂടിയാണ് ഈ ഗ്രൂപ്പ് സംരംഭം. ചവിട്ടി ഉല്പന്നങ്ങൾ പ്രാദേശികാടിസ്ഥാനത്തിൽ വീടുകളിൽ നേരിട്ട് ചെന്നും വിവിധ സൂപ്പർ മാർക്കറ്റുകളിലൂടെയും പ്രദർശന മേളകൾ വഴിയും വിപണനം ചെയ്യും.
ബ്ലോക്ക് വ്യവസായ വികസന ഓഫീസർ എം.രാജഗോപാലൻ റിപ്പോർട്ടവതരിപ്പിച്ചു. പഞ്ചായത്ത് പ്രസിഡന്റ് കെ.രേവതി ബാബു അദ്ധ്യക്ഷയായി. വൈസ് പ്രസിഡന്റ് എസ്.സുനിൽകുമാർ, ബ്ലോക്ക് വൈസ് പ്രസിഡന്റ് ബി.സിന്ധു, സ്ഥിരസമിതി അദ്ധ്യക്ഷൻ ജെ.മഹേഷ്, ബ്ലോക്കംഗങ്ങളായ കെ.വിജയൻ, വിശാലാക്ഷി, കെ.ജി.സരോജ, പഞ്ചായത്തംഗങ്ങളായ രമേഷ്, സുമതി, യൂണിറ്റ് പ്രസിഡന്റ് ശുഭ തുടങ്ങിയവർ പങ്കെടുത്തു.