പാലക്കാട്: കൂട്ടുപാത ഡംപ് സൈറ്റിൽ ബയോമൈനിംഗ് പദ്ധതി നടപ്പാക്കുന്നതിന് മുന്നോടിയായുള്ള ആദ്യഘട്ട കൂടിയാലോചനാ യോഗം ചേർന്നു. ബയോമൈനിംഗ് പദ്ധതി സംബന്ധിച്ച് ടെക്നിക്കൽ കൺസൾട്ടന്റ് പ്രതിനിധികളായ സതീഷ് ബാബു, ജിബിൻ എന്നിവർ വിശദീകരിച്ചു. പദ്ധതി നടപ്പാക്കുന്നതിനായി ഡി.പി.ആർ തയ്യാറാക്കി ടെൻഡർ നടപടി അന്തിമ ഘട്ടത്തിൽ പുരോഗമിക്കുകയാണെന്ന് പ്രോജക്ട് മാനേജ്‌മെന്റ് യൂണിറ്റ് വ്യക്തമാക്കി.
പദ്ധതി നടപ്പാക്കുന്നതിന് മുന്നോടിയായി ബയോ മൈനിംഗ് നടപ്പാക്കുന്ന സ്ഥലത്തെ ശബ്ദ, വായു, ജല മലിനീകരണത്തെ കുറിച്ചും മാലിന്യത്തിന്റെ ഫിസിക്കൽ അനാലിസിസ് ചെയ്യുന്നതിനായി ഗ്രൗണ്ടിന്റെ നാല് ഭാഗത്ത് നിന്നും സാമ്പിൾ ശേഖരിച്ചും വിദഗ്ധ സമിതി പഠനം നടത്തിയിരുന്നു. അടുത്തയാഴ്ച നടക്കുന്ന രണ്ടാം ഘട്ട യോഗത്തിൽ മാലിന്യം നിക്ഷേപ കേന്ദ്രത്തിന് സമീപമുള്ള പരിസരവാസികൾ, സ്ഥാപനപ്രതിനിധികൾ എന്നിവരുമായി പദ്ധതി വിശദീകരണം നടത്താനും എല്ലാത്തരത്തിലുള്ള സാമൂഹിക, പാരിസ്ഥിതിക, ആരോഗ്യ സംരക്ഷണ നടപടികൾ പദ്ധതിയുടെ ഭാഗമായി ഉറപ്പുവരുത്തും.
ജില്ലാ കലക്ടറുടെ ചേംബറിൽ ചേർന്ന യോഗത്തിൽ ജില്ലാ കലക്ടർ ഡോ.എസ്.ചിത്ര അദ്ധ്യക്ഷയായി. നഗരസഭാദ്ധ്യക്ഷ പ്രമീള ശശിധരൻ, ഉപാദ്ധ്യക്ഷൻ ഇ.കൃഷ്ണദാസ്, സ്ഥിരസമിതി അദ്ധ്യക്ഷൻ പി.സ്മിതേഷ്, കൊടുമ്പ് പഞ്ചായത്ത് പ്രസിഡന്റ് ധൻരാജ്, വൈസ് പ്രസിഡന്റ് എം.കെ.ശാന്ത, തദ്ദേശ വകുപ്പ് ജോയിന്റ് ഡയറക്ടർ ആർ.രവിരാജ്, നവകേരളം മിഷൻ ജില്ലാ കോഓർഡിനേറ്റർ പി.സൈതലവി, മാലിന്യമുക്തം നവകേരളം കോകോർഡിനേറ്റർ വൈ.കല്യാണകൃഷ്ണൻ, ശുചിത്വ മിഷൻ പ്രോഗ്രാം ഓഫീസർ ഷെരീഫ്, ജില്ലാ മലിനീകരണ നിയന്ത്രണ ബോർഡ് എക്സിക്യൂട്ടീവ് എൻജിനീയർ കെ.എസ്.ദിനേശ്, നഗരസഭാ സെക്രട്ടറി ടി.ജി.അജേഷ്, പഞ്ചായത്ത് അസിസ്റ്റന്റ് സെക്രട്ടറി എ.അജിത, നഗരസഭ ക്ലീൻ സിറ്റി മാനേജർ ഇ.പി.വിസ്മൽ, കേരള ഖര മാലിന്യ പരിപാലന പദ്ധതി ജില്ലാ പ്രൊജക്ട് മാനേജ്‌മെന്റ് യൂണിറ്റ് ഉദ്യോഗസ്ഥർ തുടങ്ങിയവർ പങ്കെടുത്തു.
ബയോമൈനിംഗിന്റെ സാദ്ധ്യതകൾ
കുമിഞ്ഞുകൂടിയ മാലിന്യങ്ങൾ മണ്ണിൽ നിന്നും ജൈവ വിഘടന പ്രക്രിയ വഴി വേർതിരിച്ച് പുനചംക്രമണത്തിന് (റീസൈക്ലിംഗ്) കൈമാറുന്ന രീതിയാണ് ബയോമൈനിംഗ് (ജൈവ ഖനന പ്രക്രിയ). സാങ്കേതിക വിദ്യകളുടെയും ഭൗതിക, രാസ, പാരിസ്ഥിതിക, സാമൂഹിക റിപ്പോർട്ടുകളുടെയും പഠനങ്ങളുടെയും അടിസ്ഥാനത്തിൽ ഡംപ് സൈറ്റിൽ 92284.30 ഘന മീറ്റർ (1,00,959.02 ടൺ) പരമ്പരാഗത മാലിന്യം (ലെഗസി വേസ്റ്റ്) ഉള്ളതായും കണ്ടെത്തിയിരുന്നു. ബയോമൈനിംഗ് രീതി അവലംബിച്ചാണ് മാലിന്യം നീക്കം ചെയ്യുക. പൈതൃക മാലിന്യം നിക്ഷേപിച്ച 6.04 ഏക്കർ സ്ഥലം പൂർണമായി വീണ്ടെടുക്കും.