മല്ലപ്പള്ളി: കോട്ടാങ്ങൽ മഹാഭദ്ര കാളി ക്ഷേത്രത്തിൽ കുളത്തൂർ, കോട്ടാങ്ങൽ കരക്കാരുടെ നേതൃത്വത്തിൽ നടന്ന എട്ടു പടയണി സമാപിച്ചു. ഇന്ന് ഇരു കരക്കാരും പുല വൃത്തം തുള്ളി പിരിയും. ഇന്നലെ കോട്ടാങ്ങൽ കരക്കാരുടെ വലിയ പടയണി നടന്നു. .രാത്രി ഒരുമണിക്ക് 101പാള ഭൈരവി കോലം കളത്തിൽ എത്തി.
തുടർന്ന് 16,32,64 പാള ഭൈരവികൾ, അരക്കിയക്ഷി, സുന്ദരയക്ഷി, മറുത,കൂട്ടമറുത, പക്ഷി എന്നീ കോലങ്ങളും തുള്ളിയൊഴിഞ്ഞു.
നാലുമണിയോടെ കാലൻ കോലം കളത്തിലെത്തി. മംഗള ഭൈരവിയോടെ വലിയ പടയണി സമാപിച്ചു. തുടർന്ന് കോട്ടാങ്ങൽ അമ്മ കല്ലൂപ്പാറ ക്ഷേത്രത്തിലേക്ക് എഴുന്നള്ളി. ക്ഷേത്രത്തിൽ നിന്ന് കാവുംകടവിലേക്ക് നടന്ന എഴുന്നള്ളത്തിൽ ഇരുകരക്കാരും പങ്കെടുത്തു. ഇന്ന് വൈകിട്ട് ക്ഷേത്രത്തിൽ കുളത്തൂർ, കോട്ടാങ്ങൽ കരക്കാർ പുല വൃത്തം തുള്ളി 28 പടയണിക്ക് പര്യവസാനം കുറിക്കും. പടയണി ചടങ്ങുകൾക്ക് ശ്രീദേവി വിലാസം പടയണി സംഘം കുളത്തൂർ, ശ്രീഭദ്ര പടയണി സംഘം കോട്ടാങ്ങൽ, ശ്രീ മഹാ ഭദ്രകാളി ക്ഷേത്രം ഭരണസമിതി( കോട്ടാങ്ങൽ ദേവസ്വം ), വിവിധ സർക്കാർ വകുപ്പുകൾ എന്നിവ നേതൃത്വം നൽകി.