റാന്നി: പെരുമ്പെട്ടി ഗവ.എൽ.പി സ്കൂളിന് പുതിയ കെട്ടിടം നിർമ്മിക്കുന്നതിനായി 1 കോടി 5 ലക്ഷം രൂപ അനുവദിച്ചതായി അഡ്വ.പ്രമോദ് നാരായൺ എം.എൽ.എ അറിയിച്ചു. എം.എൽ.എയുടെ അഭ്യർത്ഥനപ്രകാരം പൊതുവിദ്യാഭ്യാസ വകുപ്പ് പ്ലാൻ ഫണ്ടിൽ നിന്നാണ് തുക അനുവദിച്ചിരിക്കുന്നത്. കാലപ്പഴക്കത്താൽ ചോർന്ന പഴയ കെട്ടിടം ഇപ്പോൾ തകര ഷീറ്റ് പാകി സംരക്ഷിച്ചിരിക്കുകയാണ്. നല്ല നിലയിൽ പ്രവർത്തിക്കുന്ന സ്കൂളിന്റെ ദുരവസ്ഥ ശ്രദ്ധയിൽ പെട്ടതോടെയാണ് സ്കൂളിന് പുതിയ കെട്ടിടം നിർമ്മിക്കണമെന്ന് എം.എൽ.എ വിദ്യാഭ്യാസ മന്ത്രി വി ശിവൻകുട്ടിയോട് അഭ്യർത്ഥിച്ചത്. ഇതിന്റെ ഫലമായാണ് ഇപ്പോൾ പുതിയ സ്കൂൾ കെട്ടിടത്തിന് പ്ലാൻ ഫണ്ടിൽ ഉൾപ്പെടുത്തി തുക അനുവദിച്ചിരിക്കുന്നത്. കുട്ടികൾക്കുള്ള ക്ലാസ് മുറികൾ അദ്ധ്യാപകരുടെ മുറി ഓഫീസ് മുറി ടോയ്ലറ്റ് സംവിധാനം എന്നിവയെല്ലാം പുതിയ കെട്ടിടത്തിൽ ഉൾക്കൊള്ളിച്ചിട്ടുണ്ട്.