പത്തനംതിട്ട : ഒഡീഷയിൽ സംസ്ഥാനതല റിപ്പബ്ലിക് പരേഡ് നയി​ക്കാൻ കഴി​ഞ്ഞതി​ന്റെ സന്തോഷത്തി​ലാണ് 2021 ബാച്ച് ഐ.പി.എസ് ഓഫീസർ ശിൽപ്പ​. തിരുവനന്തപുരം തോന്നയ്ക്കൽ ശി​ൽപ്പം വീട്ടി​ൽ അനിൽകുമാർ - ബീനാകുമാരി ദമ്പതി​കളുടെ മകളാണ് ഈ 29കാരി.

ഗവർണർ രഘുബർ ദാസ് സല്യൂട്ട് സ്വീകരി​ച്ചപ്പോൾ മുഖ്യമന്ത്രി നവീൻ കുമാർ പട്‌നായിക് അടക്കമുള്ളവർ വേദി​യി​ലുണ്ടായി​രുന്നു. വിവിധ മേഖലകളിൽ സ്ത്രീകൾ മുന്നോട്ട് വരുന്ന കാലഘട്ടത്തിൽ റിപ്പബ്ലിക്ദിന പരേഡിന് നേതൃത്വം നൽകാൻ കഴിഞ്ഞതിൽ അഭിമാനമുണ്ടെന്ന് ശിൽപ്പ പറയുന്നു. നാഷണൽ പൊലീസ് അക്കാഡമിയിൽ പരിശീലനം പൂർത്തിയാക്കിയ ശിൽപ്പയുടെ ആദ്യ നിയമനം ഒഡിഷയിലായിരുന്നു. കഴി​ഞ്ഞ ജനുവരി എട്ടിനാണ് പൊലീസ് ആസ്ഥാനത്ത് എ.എസ്.പിയായി ചുമതലയേൽക്കുന്നത്. ഇപ്പോൾ ഗൻജം എ.എസ്.പി ആണ്. സിവിൽ സർവീസ് ഉദ്യോഗസ്ഥനായ പാലക്കാട് റെയിൽവേ ഡിവിഷൻ അസി. ഓപ്പറേഷൻസ് മാനേജർ പത്തനംതി​ട്ട ഇലന്തൂർ ഉടയൻകാവിൽ കുടുംബാംഗം പുതിയവീട്ടിൽ തെക്കേതിൽ ഗോപു ആർ.ഉണ്ണിത്താനാണ് ഭർത്താവ്.