അടൂർ: പരീക്ഷാ പേ ചർച്ചയിൽ കേരളത്തെ പ്രതിനിധീകരിച്ചതി​ലൂടെ അടൂർ കേന്ദ്രീയ വിദ്യാലയത്തി​ന്റെ അഭിമാനമായി​രി​ക്കുകയാണ് ആദർശ് ആർ.നായർ. 11-ാം ക്ലാസ് വിദ്യാർത്ഥിയായ ആദർശ്, ബിയോണ്ട് റെഡ് ആൻഡ് ഗ്രീൻ സ്മാർട്ട് ട്രാഫിക് സിഗ്നൽ എന്ന നൂതന പദ്ധതിയാണ് ഇന്നലെ ഡൽഹിയിലെ ഭാരത് മണ്ഡപത്തിൽ പ്രധാനമന്ത്രി നരേന്ദ്രമോദിക്ക് മുന്നിൽ അവതരിപ്പിച്ചത്. ആർട്ടിഫിഷ്യൽ ഇൻറലിജൻസ് ഉപയോഗിച്ച് ഗതാഗത സിഗ്നൽ സംവിധാനം ക്രമീകരിക്കുന്നതായി​രുന്നു ആദർശി​ന്റെ ആശയം. അതുവഴി വാഹനങ്ങളുടെ നീണ്ട നിര ഇല്ലാതാക്കാനും സമയം ലാഭിക്കാനും കഴിയും. ക്യാമറകൾ പ്രവർത്തിപ്പിച്ച് വാഹനങ്ങൾ കൂടുതലുള്ള വശങ്ങളിലെയും ആംബുലൻസ് പോലുള്ള എമർജൻസി വാഹനങ്ങൾ ഉള്ള വശങ്ങളിലേയും സിഗ്നലുകൾ ഗ്രീനാക്കി​ ഗതാഗതക്രമീകരണം ഒരുക്കുന്നതായി​രുന്നു പദ്ധതി​. കേന്ദ്രീയ വിദ്യാലയം കൊച്ചി റീജനെ പ്രതിനിധീകരിച്ചാണ് ആദർശ് പങ്കെടുത്തത്. അടൂർ കേന്ദ്രീയ വിദ്യാലയത്തിലെ പി ജി ടി​ കമ്പ്യൂട്ടർ സയിൻസ് അദ്ധ്യാപിക എസ്.ശ്രീലക്ഷമിയാണ് ആദർശിനെ സഹായിച്ചത്. അദ്ധ്യാപകൻ ആർ.സജി പരീക്ഷ പേ ചർച്ചയിൽ ആദർശിനൊപ്പം പങ്കെടുത്തു. വിശാഖപട്ടണത്തെ ഡിഫൻസ് സെക്യൂരിറ്റി കോർപ്സിൽ ജോലി ചെയ്യുന്ന രാജേഷ് ബാബുവിന്റെയും ദേശീയ ആരോഗ്യമിഷൻ പ്രവർത്തകയായ ദിവ്യാ ദേവിയുടേയും മകനാണ് ആദർശ്.