കൊല്ലം: ജില്ലയിൽ ഒരു മാസത്തിനിടെ പകർച്ച വ്യാധികൾ ബാധിച്ച് വിവിധ ആശുപത്രികളിൽ ചികിത്സ തേടിയത് 14,695 പേർ. നവംബറിൽ അയ്യായിരത്തിലധികം പേരാണ് ചികിത്സ തേടിയത്. ഇരട്ടിയിലധികം രോഗികളുടെ വർദ്ധനവാണ് ഒരുമാസത്തിനിടെ ഉണ്ടായത്.

430 പേർ കിടത്തി ചികിത്സയ്ക്ക് വിധേയരായി​. 222 പേർക്കാണ് ഒരുമാസത്തിനുള്ളിൽ ഡെങ്കിപ്പനി സ്ഥിരീകരിച്ചത്. 24 പേർക്ക് എലിപ്പനിയും ഒരാൾക്ക് മലേറിയയും സ്ഥിരീകരിച്ചു. ഇതിന് പുറമേ പാൾസി പാം മലേറിയ, എച്ച്.വൺ എൻ.വൺ, മലമ്പനി, റാബിസ്, ചിക്കൻപോക്സ്, മലേറിയ, ചെങ്കണ്ണ് ഉൾപ്പെടെയുള്ള രോഗങ്ങൾ ജില്ലയിൽ വ്യാപി​ക്കുകയാണ്.

ഏറ്റവും അധികം രോഗികൾ ചികിത്സ തേടിയെത്തിയത് ഡിസംബർ 6 നാണ്, 830 പേർ. കിടത്തി ചികിത്സയ്ക്ക് ഏറ്റവും അധികം പേർ വിധേയമായത് 15നും, 681 പേർ. ഡെങ്കിപ്പനി, എലിപ്പനി രോഗികൾ കൂടുതലും കിഴക്കൻ മേഖലകളിലും കോർപ്പറേഷൻ പരിധിയിലും തീരമേഖലകളിലുമാണ്.

കൊവിഡും കൂടുന്നു

ജില്ലയിലും കൊവി​ഡി​ന്റെ ഒമിക്രോൺ വകഭേദം ജെ.എൻ 1 വ്യാപിക്കുന്നതായി ആരോഗ്യ വകുപ്പ് അധികൃതർ മുന്നറിയിപ്പ് നൽകി. 45 വയസിന് മുകളിലുള്ളവരിലാണ് പുതിയ വകഭേദം കൂടുതലായി കാണുന്നത്. ദിവസം 4 - 5 വരെ രോഗികൾ ചികിത്സ തേടുന്നുണ്ട്. എന്നാൽ ആരുടെയും നില ഗുരുതരമല്ല.