സമ്പൂർണ ഡി​ജി​റ്റൽ സാക്ഷരത പ്രഖ്യാപനം ഇന്ന്

കൊല്ലം: ഡിജിറ്റൽ സാക്ഷരത നേടി​യ, ജി​ല്ലയി​ലെ ആദ്യ നഗരസഭയായി​ കൊട്ടാരക്കരയെ ഇന്ന് പ്രഖ്യാപി​ക്കും. വൈകിട്ട് 3ന് ഗാന്ധിമുക്കിൽ ചേരുന്ന യോഗത്തിൽ മന്ത്രി കെ.എൻ.ബാലഗോപാൽ പ്രഖ്യാപനം നടത്തും. നഗരസഭ ചെയ‌ർമാൻ എസ്.ആർ.രമേശ് അദ്ധ്യക്ഷത വഹിക്കും. കൊടിക്കുന്നിൽ സുരേഷ് എം.പി സർട്ടിഫിക്കറ്റ് കൈമാറും.

സംസ്ഥാന സർക്കാരിന്റെ ഡിജി കേരള പദ്ധതിക്ക് മുന്നോടിയായി 2023- 24 വാർഷിക പദ്ധതിയിൽ ഉൾപ്പെടുത്തിയാണ് നഗരസഭ സമ്പൂർണ ഡിജിറ്റൽ സാക്ഷരതാ യജ്ഞം സംഘടിപ്പിച്ചത്. നഗരസഭയിലെ 29 വാർഡ് സമിതികളും താഴേ തലങ്ങളിൽ ക്ളസ്റ്റർ സമിതികളും രൂപീകരിച്ചായി​രുന്നു പ്രവർത്തനങ്ങൾ. കിലയുടെ പൂർണ പിന്തുണ ഉണ്ടായി​രുന്നു. കൊട്ടാരക്കര ഐ.എച്ച്.ആർ.ഡി എൻജിനീയറിംഗ് കോളേജ് പ്രിൻസിപ്പൽ ഡോ.വി.ഭദ്രന്റെ നേതൃത്വത്തിൽ കോളേജിൽ കഴിഞ്ഞ സെപ്തംബർ 16ന് വിപുലമായ പരിശീലന പരിപാടിയൊരുക്കി. മനോജ് റായിയുടെ നേതൃത്വത്തിൽ തയ്യാറാക്കി​യ പഠന സഹായി നഗരസഭ പ്രിന്റ് ചെയ്ത് എല്ലാ പഠിതാക്കൾക്കും എത്തിച്ചു. 29 വോളണ്ടിയർമാരെ നിയോഗിച്ച് പഠന ക്ളാസുകൾക്ക് സഹായം നൽകി. പ്രത്യേക ഗൂഗിൾ ഫോം ഉപയോഗി​ച്ചാണ് സർവേ നടത്തിയത്.

തുടക്കം കുലശേഖരനല്ലൂരി​ൽ

കുലശേഖരനല്ലൂർ വാർഡിലായി​രുന്നു സർവേ തുടക്കം. ഗാന്ധിമുക്ക് വാർഡിൽ പഠന ക്ളാസുകൾ ആദ്യം ആരംഭി​ച്ചു. നഗരസഭ കൗൺസിലർമാരും അങ്കണവാടി, ആശാവർക്കർമാരും റിസോഴ്സ് പേഴ്സൺമാരും പ്രവർത്തനങ്ങൾ ഏകോപിപ്പിച്ചു.

കമ്പ്യൂട്ടർ പരിജ്ഞാനമുള്ള 29 സന്നദ്ധപ്രവർത്തകരെ അപേക്ഷ ക്ഷണിച്ച് റിസോഴ്സ് പേഴ്സൺമാരാക്കി​. നഗരസഭയിലെ എല്ലാ വീടുകളും സന്ദർശിച്ച് സർവേ പൂർത്തിയാക്കി​ ക്ളാസുകൾ നൽകി​. ക്ളാസി​ൽ ഹാജർ ബുക്ക് ഉൾപ്പെടെ ഉണ്ടായിരുന്നു. വാർഡ് സഭകളിലും തൊഴിൽ ഇടങ്ങളിലുമൊക്കെ ക്ളാസുകൾ നടത്തി. ക്ളാസുകളിൽ പങ്കെടുക്കാത്തവരെ വീട്ടി​ലെത്തി പഠിപ്പിച്ചു.

ചി​ട്ടയായ തയ്യാറെടുപ്പ്

1. ഡിജിറ്റൽ സാക്ഷരത ക്ളാസിനായി പത്ത് വിഷയങ്ങൾ ക്രമീകരിച്ചു

2. മൊബൈൽ ഫോൺ, കമ്പ്യൂട്ടർ ഉപയോഗങ്ങൾ എല്ലാവരിലും എത്തിച്ചു

3. എല്ലാ പഠിതാക്കളെയും നേരിൽകണ്ട് പുരോഗതികൾ വിലയിരുത്തി

4. നഗരസഭ ചെയർമാൻ എസ്.ആർ.രമേശ്, കോ-ഓർഡിനേറ്റർ ബി.എസ്.ഗോപകുമാർ ഉൾപ്പെടെ പങ്കെടുത്തു

5. കില നിയോഗിച്ച ഉദ്യോഗസ്ഥർ അന്തിമ പരിശോധന നടത്തി​

6. ഇവയ്ക്കെല്ലാം ഒടുവി​ൽ ഡിജിറ്റൽ സാക്ഷരത പ്രഖ്യാപനം