കൊല്ലം: ഫാത്തിമ മെമ്മോറിയൽ എഡ്യുക്കേഷണൽ ട്രസ്റ്റും കൊല്ലം പ്രസ്ക്ലബ്ബും സംയുക്തമായി ട്രസ്റ്റ് സ്ഥാപക ചെയർമാനും മുൻ എം.എൽ.എയുമായ ഡോ. എ. യൂനുസ് കുഞ്ഞിന്റെ സ്മരണയ്ക്ക് ഏർപ്പെടുത്തിയ ഡോ.എ.യൂനുസ് കുഞ്ഞ് സ്മാരക മാദ്ധ്യമ അവാർഡിന് (25,000 രൂപയും പ്രശസ്തി പത്രവും) അപേക്ഷ ക്ഷണിച്ചു. വ്യവസായവുമായി ബന്ധപ്പെട്ട വികസനോന്മുഖ റിപ്പോർട്ടിനാണ് അവാർഡ്. 2023 ജനുവരി 1 മുതൽ ഡിസംബർ 31 വരെ കേരളത്തിൽനിന്ന് പ്രസിദ്ധീകരിച്ച റിപ്പോർട്ടുകളാണ് പരിഗണിക്കുക. പത്ര റിപ്പോർട്ടിനുള്ള അവാർഡിന് മലയാളം, ഇംഗ്ലീഷ് ഭാഷകളിലുള്ളവ പരിഗണിക്കും. ഒരാൾ ഒരു എൻട്രി മാത്രമേ അയയ്ക്കാവൂ. പത്ര, ദൃശ്യമാദ്ധ്യമ സ്ഥാപന മേലധികാരിയുടെ (ന്യൂസ് എഡിറ്റർ/ ബ്യൂറോ ചീഫ്) സാക്ഷ്യപത്രം 26 നകം എൻട്രികൾ ലഭിക്കണം. പത്ര റിപ്പോർട്ടുകൾ അയയ്ക്കേണ്ട വിലാസം: സെക്രട്ടറി, പ്രസ് ക്ലബ്, ചിന്നക്കട, കൊല്ലം 691001. ദൃശ്യമാദ്ധ്യമ റിപ്പോർട്ടുകൾ രണ്ടു മിനിട്ടിൽ കൂടാൻ പാടില്ല. വീഡിയോ ഗൂഗിൾ ഡ്രൈവിൽ അപ്‌ലോഡ് ചെയ്തശേഷം ഡൗൺലോഡ് ലിങ്കും സ്ഥാപന മേലധികാരിയുടെ സാക്ഷ്യപത്രവും സഹിതം Kollampressclub@gmail.com എന്ന വിലാസത്തിൽ അയയ്ക്കണം. ഫെബ്രുവരി മൂന്നിന് കൊല്ലം പ്രസ് ക്ലബ്ബിൽ നടക്കുന്ന ചടങ്ങിൽ അവാർഡ് സമ്മാനിക്കും. ഫോൺ: 7907348963.