കൊല്ലം: ശ്രീനാരായണ ഗുരു ഓപ്പൺ സർവകലാശാലയുടെ പ്രഥമ പി.ജി ഒന്നാം സെമസ്റ്റർ എം എ ഇംഗ്ലീഷ് / മലയാളം (2022 അഡ്മിഷൻ) പരീക്ഷകളുടെ ഫലം പ്രഖ്യാപിച്ചു. സർവകലാശാല ആസ്ഥാനത്ത് വൈസ് ചാൻസലർ ഡോ. പി.എം. മുബാറക് പാഷ പരീക്ഷാഫലം പരീക്ഷ കൺട്രോളർ ഡോ. ജെ ഗ്രേഷ്യസിന് കൈമാറി പ്രസിദ്ധീകരിച്ചു.

പ്രോ. വൈസ് ചാൻസലർ ഡോ. എസ്.വി. സുധീർ, രജിസ്ട്രാർ ഡോ. ഡിംപി വി.ദിവാകരൻ, സൈബർ കൺട്രോളർ ഡോ. എം. ജയമോഹൻ, ഫിനാൻസ് ഓഫീസർ എസ്. ശരണ്യ, സിൻഡിക്കേറ്റ് അംഗങ്ങളായ അഡ്വ .ബിജു കെ.മാത്യു, ഡോ. എം.ജയപ്രകാശ്, ഡോ. കെ. ശ്രീവത്സൻ എന്നിവർ പങ്കെടുത്തു. എം.എ ഒന്നാം സെമസ്റ്റർ പരീക്ഷയിൽ 83.59 ശതമാനം പേർ വിജയിച്ചു. പരീക്ഷാ ഫലം www.sgou.ac.in എന്ന വെബ്‌സൈറ്റിൽ ലഭ്യമാണ്. അസൈൻന്മെന്റുകൾ സമർപ്പിച്ചിട്ടില്ലാത്ത പഠിതാക്കളുടെ ഫലം പ്രസിദ്ധീകരിച്ചിട്ടില്ല. പഠിതാക്കളുടെ കോഴ്സുകൾ തിരിച്ചുള്ള മാർക്കുകൾ www.sgou.ac.in/marksheet എന്ന ലിങ്കിൽ ലഭ്യമാണ്. ഉത്തരക്കടലാസിന്റെ സോഫ്റ്റ് കോപ്പി ലഭിക്കാൻ കോഴ്‌സ് ഒന്നിന് 300 രൂപ വീതം ഫീസ് അടച്ചു ഓൺലൈനായി മാത്രം അടുത്തമാസം അഞ്ച് വരെ അപേക്ഷിക്കാം. അപേക്ഷ സമർപ്പിക്കുന്നതിനായി erp.sgou.ac.in ലെ ലേണർ ഡാഷ്‌ബോർഡ് സന്ദർശിക്കണം. ഫോൺ​: 9188920013,9188920014