ജി.എസ്.ടിയും റോയൽറ്റിയും സർക്കാർ ഒഴിവാക്കിയേക്കും

കൊല്ലം: കേന്ദ്ര നിബന്ധന പ്രകാരം, ഗ്രീൻഫീൽഡ് ഹൈവേ നിർമ്മാണത്തിന് ജി.എസ്.ടിയും റോയൽറ്റിയും ഒഴിവാക്കുന്നതിന്റെ സാദ്ധ്യത പരിശോധിക്കാൻ സംസ്ഥാന സർക്കാർ തീരുമാനി​ച്ചതോടെ, കടമ്പാട്ടുകോണം- ചെങ്കോട്ട ഗ്രീൻഫീൽഡ് ഹൈവേ നി​ർമ്മാണത്തി​ലെ കാറും കോളും ഒഴി​യുന്നു. ദേശീയപാത വികസനവുമായി ബന്ധപ്പെട്ട് മുഖ്യമന്ത്രി വിളിച്ചുചേർത്ത യോഗത്തിലാണ് തീരുമാനം.

സ്ഥലമേറ്റെടുക്കൽ ചെലവിന്റെ 25 ശതമാനം സംസ്ഥാന സർക്കാർ വഹിക്കാമെന്ന ധാരണയിലാണ് ഗ്രീൻഫീൽഡ് ഹൈവേയുടെ നടപടി ക്രമങ്ങൾ ആരംഭിച്ചത്. തുടർന്ന് പാത കടന്നുപോകുന്ന ബഹുഭൂരിപക്ഷം വില്ലേജുകളിലും സ്ഥലമേറ്റെടുക്കലിന്റെ ആദ്യഘട്ടമായ ത്രി എ വിജ്ഞാനം പുറപ്പെടുവിച്ചു. ഇതിനിടെ സംസ്ഥാന സർക്കാർ കടുത്ത സാമ്പത്തിക പ്രതിസന്ധിയിലായതോടെ 25 ശതമാനം ചെലവ് വഹിക്കാമെന്ന ഉറപ്പി​ൽ നിന്നു പിന്നോട്ടുപോയി. കേരളത്തിലെ ഭീമമായ സ്ഥലമേറ്റെടുക്കൽ ചെലവ് പൂർണമായും തങ്ങൾക്ക് വഹിക്കാനാകില്ലെന്ന് നാഷണൽ ഹൈവേ അതോറിട്ടി​ നിലപാടെടുത്തതോടെ ആകെ പ്രതിസന്ധിയായി.

നിർമ്മാണ സാമഗ്രികൾക്കുള്ള ജി.എസ്.ടിയോ റോയൽറ്റിയോ ഒഴിവാക്കിയാൽ സ്ഥലമേറ്റെടുക്കൽ ചെലവ് പൂർണമായും തങ്ങൾ വഹിക്കാമെന്ന വ്യവസ്ഥ എൻ.എച്ച്.എ.ഐ പി​ന്നീട് മുന്നോട്ടുവച്ചു. നഷ്ടത്തി​ന്റെ പേരി​ൽ ഇതും സർക്കാർ ആദ്യഘട്ടത്തിൽ അംഗീകരിച്ചില്ല. പ്രതിസന്ധി നീണ്ടാൽ റോഡ് നി​ർമ്മാണം മുടങ്ങുമെന്ന അവസ്ഥ വന്നതോടെയാണ് നഷ്ടം സഹിക്കുന്നതിനെക്കുറിച്ചുള്ള ആലോചന തുടങ്ങിയത്. ധന, പൊതുമരാമത്ത് വകുപ്പ് സെക്രട്ടറിമാർ സംയുക്തമായാകും റോയൽട്ടിയും ജി.എസ്.ടിയും ഒഴിവാക്കുന്നത് സംബന്ധിച്ച പരിശോധന നടത്തുക. ഇവരുടെ റിപ്പോർട്ടിന്റെ അടിസ്ഥാനത്തിൽ അന്തിമ തീരുമാനമെടുക്കും.

11 വി​ല്ലേജുകളി​ലൂടെ

ജില്ലയിലെ 11 വില്ലേജുകളിലൂടെയും കടമ്പാട്ടുകോണം- ചെങ്കോട്ട ഗ്രീൻഫീൽഡ് ഹൈവേ കടന്നുപോകുന്നം. ഇതിൽ വനമേഖലകളായ തെന്മല, ആര്യങ്കാവ് വില്ലേജുകളിലെ അലൈൻമെന്റ് അന്തിമമായിട്ടില്ല. ബാക്കി ഒൻപത് വില്ലേജുകളിൽ വിലനിർണയം പൂർത്തിയായി. തർക്കം കാരണം ബാക്കി അഞ്ച് വില്ലേജുകളിലെ ത്രി എ വിജ്ഞാപനം കഴിഞ്ഞ നവംബറിൽ റദ്ദായി. ത്രി ഡി നിലവിൽ വന്ന തിരുവനന്തപുരം ജില്ലയിലെ വില്ലേജുകളിലെയും തുടർ നടപടികൾ നിലവിൽ സ്തംഭനത്തിലാണ്. ത്രി ഡി വിജ്ഞാപനം നിലനിൽക്കുന്ന ഭൂമി വിൽക്കാനോ പണയം വയ്ക്കാനോ കഴിയാതെ ഉടമകൾ കടുത്ത പ്രതിസന്ധിയിലുമായി​.

ത്രി ഡി വി​ജ്ഞാപനം നിലവിൽ വന്ന വില്ലേജുകൾ

നിലമേൽ, ഇട്ടിവ, അലയമൺ, അഞ്ചൽ

ത്രി എ വി​ജ്ഞാപനം റദ്ദായ വില്ലേജുകൾ

ഏരൂർ, കോട്ടുക്കൽ, ചടയമംഗലം, ഐരനല്ലൂർ, ഇടമൺ

പാതയ്ക്കായി ആകെ ഏറ്റെടുക്കുന്ന ഭൂമി: 265 ഹെക്ടർ

നീളം: 59.36 കി.മീറ്റർ

കടമ്പാട്ടുകോണം-ആര്യങ്കാവ് റോഡ് വീതി: 45 മീറ്റർ (4 വരി)

വനമേഖല: 30 മീറ്റർ (ആര്യങ്കാവ്- തെന്മല)

അടങ്കൽ തുക: 4047 കോടി