ചാലക്കുടി: ആളൂർ പഞ്ചായത്തിലെ പൊരുന്നംകുന്ന് വ്യാജമദ്യ നിർമ്മാണവുമായി ബന്ധപ്പെട്ട് സമഗ്രാന്വേഷണം വേണമെന്ന് ആവശ്യപ്പെട്ടും ബി.ജെ.പിയാണ് ഇതിന്റെ പിന്നിലെന്ന് ആരോപിച്ചും സി.പി.ഐ ആളൂർ ലോക്കൽ കമ്മിറ്റി വെള്ളാഞ്ചിറയിൽ പ്രകടനവും പൊതുയോഗവും നടത്തി. ആസന്നമായ ലോക്‌സഭാ തിരഞ്ഞെടുപ്പിന്റെ ഭാഗമാണ് ഇതെന്നും കൊടകര കുഴൽപ്പണക്കേസിന് സമാനമായ സംഭവത്തിന് പിന്നിൽ വൻ ലോബിയുണ്ടെന്നും സി.പി.ഐ ആരോപിച്ചു.
പ്രകടനം വെള്ളാഞ്ചിറ പള്ളി ബസ് സ്റ്റോപ്പ് പരിസരത്ത് സമാപിച്ചു. യോഗത്തിൽ സി.പി.ഐ പഞ്ചായത്ത് സ്ഥിരം സമിതി ചെയർമാൻ ദിപിൻ പാപ്പച്ചൻ അദ്ധ്യക്ഷനായി. എ.ഐ.വൈ.എഫ് ജില്ലാ പ്രസിഡന്റ് ബിനോയ് ഷബീർ, സി.പി.ഐ മണ്ഡലം സെക്രട്ടേറിയറ്റ് അംഗം എം.ബി. ലത്തീഫ്, ലോക്കൽ സെക്രട്ടറി ടി.സി. അർജുനൻ, ബിന്ദു ഷാജു എന്നിവർ സംസാരിച്ചു.