ആറ്റിങ്ങൽ: മോട്ടോർ കത്തി വീടിന് തീപിടിച്ചു. കരിച്ചിയിൽ പനവേലി പറമ്പ് ശാസ്ത ക്ഷേത്രത്തിനു സമീപം ആരോൺ വിഹാറിൽ ജിനിൽ ഇഗ്നേഷിസിന്റെ വീട്ടിലാണ് തീപിടിത്തമുണ്ടായത്. വീട്ടിലുള്ളവർ മോട്ടോർ ഓണാക്കിയശേഷം പുറത്തുപോയിരുന്നു. തുടർന്ന് മോട്ടോർ അമിതമായി ചൂടായി സ്വിച്ച് ബോർഡിന് തീപിടിക്കുകയായിരുന്നു. തീ സമീപത്തെ വാഷിംഗ് മെഷീനിലേക്ക് പടർന്നുപിടിക്കുകയും വാഷിംഗ് മെഷീൻ പൂർണമായും കത്തി നശിക്കുകയും ചെയ്തു. വീട്ടിൽ നിന്ന് തീയും പുകയും ഉയരുന്നത് ശ്രദ്ധയിൽപ്പെട്ട സമീപത്തു താമസിക്കുന്ന സിവിൽ ഡിഫൻസ് വോളന്റിയർ അശ്വതി ചന്ദ്രന്റെ സമയോചിതമായ ഇടപെടലിൽ തീ നിയന്ത്രവിധേയമാക്കുകയായിരുന്നു.

പൂട്ടിക്കിടന്ന ഗേറ്റ് തകർത്ത് അശ്വതി വീട്ടിനുള്ളിൽ കയറി പ്രാഥമിക അഗ്നിശമന പ്രവർത്തനങ്ങൾ ചെയ്തു. തുടർന്ന് ആറ്റിങ്ങൽ അഗ്നിശമന നിലയത്തിൽ നിന്നുള്ള സ്റ്റേഷൻ ഓഫീസർ ജിഷാദ്, അസിസ്റ്റന്റ് സ്റ്റേഷൻ ഓഫീസർ മനോഹരൻ പിള്ള എന്നിവരുടെ നേതൃത്വത്തിലുള്ള സേന സംഭവസ്ഥലത്തെത്തി തീ പൂർണമായും അണച്ച് അപകടം ഒഴിവാക്കി.