ശിവഗിരി: തീർത്ഥാടന സമ്മേളനങ്ങളിൽ തടസമില്ലാത്ത വൈദ്യുതിയും ശബ്ദവുമെത്തിച്ചതിന്റെ ചാരിതാർത്ഥ്യത്തിലാണ് ലൈറ്റ് ആൻഡ് സൗണ്ട് കമ്മിറ്റി. സമ്മേളനങ്ങളിൽ ശബ്ദവും വെളിച്ചവും മുടങ്ങാതിരിക്കാൻ സദാ ജാഗരൂകരാണ് ഇവർ.

തീർത്ഥാടകർക്ക് താമസ സൗകര്യമൊരുക്കിയ ശിവഗിരിക്ക് ചുറ്റുമുള്ള പത്തോളം വിദ്യാഭ്യാസ സ്ഥാപനങ്ങളിലും ഇടതടവില്ലാതെ വെളിച്ചമെത്തിക്കുന്നതിനുള്ള ഉത്തരവാദിത്തം 16 വർഷമായി കുറ്റമറ്റ രീതിയിലാണ് ഇവർ നിറവേറ്റുന്നത്.

വൈദ്യുതി ബോർഡ് മുൻ ഡെപ്യൂട്ടി ചീഫ് എൻജിനിയർ ജി.മണിരാജനാണ് കമ്മിറ്റി ചെയർമാൻ. പി.ഡബ്ല്യു.ഡി ഇലക്ട്രിക്കൽ വിഭാഗം മുൻ അസി. എക്‌സി. എൻജിനിയർ വിശ്വംഭരൻ,​ അസി. എക്‌സി. എൻജിനിയർ ആർ.റോയ് (വൈസ് ചെയർമാൻ)​, പി.ഡബ്ല്യു.ഡി ഇലക്ട്രിക്കൽ വിഭാഗം മുൻ ഓവർസിയർ ബി.സുദർശനൻ,​ മിൽമ ഡെയറി ടെക്‌നീഷ്യൻ അജയകുമാർ കരുനാഗപ്പള്ളി (കൺവീനർ)​ എന്നിവരാണ് സമിതിയിലെ മറ്റംഗങ്ങൾ.

തീർത്ഥാടനമായതിനാൽ ജോലിയിൽ നിന്ന് അവധിയെടുത്താണ് ഇവർ പ്രവർത്തിക്കുന്നത്. ദിവസവും 500 കിലോവാട്സ് വൈദ്യുതിയാണ് വേണ്ടത്. 30,000 വാട്സിന്റെ ശബ്ദ സംവിധാനങ്ങളുമുണ്ട്. വൈദ്യുതി അലങ്കാരങ്ങൾ വേറെയുമുണ്ട്. സുബാഷിന്റെ നേതൃത്വത്തിൽ വർക്കല ഇടവയിലുള്ള കവിത സൗണ്ട്സാണ് തീർത്ഥാടക സമ്മേളനത്തിന് ശബ്ദവും വെളിച്ചവും എത്തിക്കുന്നത്.