തിരുവനന്തപുരം: പ്രശസ്ത മാദ്ധ്യമ പ്രവർത്തകനും കേരളകൗമുദി മുൻ എഡിറ്റോറിയൽ അഡ്വൈസറുമായ എൻ. രാമചന്ദ്രന്റെ സ്മരണാർത്ഥം രൂപീകരിച്ച എൻ. രാമചന്ദ്രൻ ഫൗണ്ടേഷന്റെ, പൊതു പ്രവർത്തനത്തിനുള്ള ദേശീയ അവാർഡിന് ഡോ. ശശി തരൂർ എം.പി. അർഹനായി. ഒരു ലക്ഷം രൂപയും ആർട്ടിസ്റ്റ് ബി.ഡി. ദത്തൻ രൂപ കല്പന ചെയ്ത ശില്പവും പ്രശസ്തി പത്രവുമടങ്ങുന്നതാണ് അവാർഡ്.

ജനുവരി എട്ടിന് വൈകുന്നേരം അഞ്ചിന് മാസ്‌കോട്ട് ഹോട്ടലിലെ സിംഫണി ഹാളിൽ നടക്കുന്ന ചടങ്ങിൽ കർണാടക ഉപ മുഖ്യമന്ത്രി ഡി.കെ. ശിവകുമാർ അവാർഡ് നൽകുമെന്ന് ഫൗണ്ടേഷൻ പ്രസിഡന്റ് പ്രഭാ വർമ്മയും സെക്രട്ടറി പി.പി.ജെയിംസും അറിയിച്ചു. പ്രശസ്ത സരോദ് സംഗീത വിദ്വാൻ അംജദ് അലി ഖാൻ മുഖ്യാതിഥിയായിരിക്കും. ഡോ. ശശി തരൂർ എൻ. രാമചന്ദ്രൻ സ്മാരക പ്രഭാഷണം നടത്തും.

ഫൗണ്ടേഷൻ വൈസ് പ്രസിഡന്റും കേരള കൗമുദി ചീഫ് എഡിറ്ററുമായ ദീപു രവി, വൈസ് പ്രസിഡന്റ് ബാബു ദിവാകരൻ, ജോയിന്റ് സെക്രട്ടറി എസ്. മഹാദേവൻ തമ്പി എക്സി.അംഗം സി.ബി. ഷാജി, ട്രഷറർ പി.ആർ. ലക്ഷ്മീദേവി, ലേഖ മോഹൻ എന്നിവരും ചടങ്ങിൽ പങ്കെടുക്കും.