തിരുവനന്തപുരം: 2023 ഒക്‌ടോബർ 14, നവംബർ 11, 25 ഡിസംബർ 9 തീയതികളിൽ പി.എസ്.സി നടത്തിയ പൊതുപ്രാഥമിക പരീക്ഷ മതിയായ കാരണങ്ങളാൽ എഴുതാൻ കഴിയാത്തവർക്ക് വീണ്ടും അവസരം നൽകും. അംഗീകൃത സർവകലാശാലകൾ/ സ്ഥാപനങ്ങൾ നടത്തിയ പരീക്ഷയെഴുതിയവർ രണ്ട് പരീക്ഷകളുടേയും അഡ്മിഷൻ ടിക്കറ്റ് (പരീക്ഷാതീയതി തെളിയിക്കുന്നതിന്) ഹാജരാക്കണം. അപകടത്തിൽ പരിക്കേറ്റ് ചികിത്സയിലുള്ളവർ/ അസുഖ ബാധിതർ/ പ്രസവസംബന്ധമായ രോഗം ഉള്ളവർ തുടങ്ങിയവർ ആശുപത്രിയിൽ ചികിത്സ നടത്തിയതിന്റെ സർട്ടിഫിക്കറ്റും മെഡിക്കൽ സർട്ടിഫിക്കറ്റും (നിശ്ചിത മാതൃകയിൽ ഉള്ളത്) ഹാജരാക്കണം. ഗർഭിണികളായ ഉദ്യോഗാർത്ഥികളിൽ യാത്രാബുദ്ധിമുട്ടുള്ളവർ/ ഡോക്ടർമാർ വിശ്രമം നിർദ്ദേശിച്ചിട്ടുള്ളവർ എന്നിവർ നിശ്ചിത മാതൃകയിലുള്ള മെഡിക്കൽ സർട്ടിഫിക്കറ്റ്, ചികിത്സാ സർട്ടിഫിക്കറ്റ് എന്നിവ ഹാജരാക്കിയാലും പരീക്ഷാ തീയതിയിൽ സ്വന്തം വിവാഹം നടന്ന ഉദ്യോഗാർത്ഥികൾ തെളിവുസഹിതം അപേക്ഷിച്ചാലും ഏറ്റവും അടുത്ത ബന്ധുക്കളുടെ മരണം കാരണം പരീക്ഷയെഴുതാൻ കഴിയാത്തവർ രേഖകൾ സഹിതം അപേക്ഷിച്ചാലും ഈ മാസം 20 ന് നടക്കുന്ന അഞ്ചാംഘട്ട പരീക്ഷ എഴുതാൻ അവസരം നൽകും. ഉദ്യോഗാർത്ഥികൾ മതിയായ രേഖകൾ സഹിതം അവരവരുടെ പരീക്ഷാകേന്ദ്രം ഉൾപ്പെടുന്ന പി.എസ്.സി ജില്ലാ ഓഫീസിൽ നേരിട്ടോ, ചുമതലപ്പെടുത്തുന്ന വ്യക്തി മുഖേനയോ നേരിട്ട് അപേക്ഷ നൽകണം. തിരുവനന്തപുരം ജില്ലയിലെ അപേക്ഷകൾ പി.എസ്.സി ആസ്ഥാന ഓഫീസിലെ ഇ.എഫ് വിഭാഗത്തിൽ നൽകണം. 10 വരെ ലഭിക്കുന്ന അപേക്ഷകൾ മാത്രമേ സ്വീകരിക്കൂ. തപാൽ/ഇ- മെയിൽ വഴി ലഭിക്കുന്ന അപേക്ഷകൾ സ്വീകരിക്കില്ല. മെഡിക്കൽ സർട്ടിഫിക്കറ്റിന്റെ മാതൃക പി.എസ്.സി വെബ്‌സൈറ്റിന്റെ ഹോം പേജിൽ മസ്റ്റ് നോ എന്ന ലിങ്കിൽ പി.എസ്.സി എക്സാമിനേഷൻ അപ്‌ഡേറ്റ്സ് എന്ന പേജിലും ജനുവരി 1 ലക്കം പി.എസ്.സി ബുള്ളറ്റിനിലും ലഭിക്കും. കൂടുതൽ വിവരങ്ങൾക്ക് ഫോൺ: 0471 2546260, 246.

പുനരളവെടുപ്പ്

പൊലീസ് വകുപ്പിൽ കോൺസ്റ്റബിൾ (ഐ.ആർ.ബി കമാൻഡോവിങ്) (കാറ്റഗറി നമ്പർ 136/2022) തസ്തികയിലേക്കുള്ള ശാരീരിക അളവെടുപ്പിൽ അപ്പീലിലൂടെ കായിക ക്ഷമതാ പരീക്ഷയിൽ പങ്കെടുത്ത് വിജയിച്ചവർക്ക് 10 ന് രാവിലെ 8 മണിക്ക് പി.എസ്.സി ആസ്ഥാന ഓഫീസിൽ പുനരളവെടുപ്പ് നടത്തും.