സഞ്ജിത് ഹെഗ്ഡെ മലയാളത്തിലേക്ക്

നസ്ളൻ, മമിത ബൈജു എന്നിവരെ കേന്ദ്ര കഥാപാത്രങ്ങളാക്കി ഗിരീഷ് എ.ഡി സംവിധാനം ചെയ്യുന്ന പ്രേമലു സിനിമയിലെ ആദ്യ ഗാനം പുറത്ത്. കന്നട-തെലുങ്ക് സിനിമകളിൽ നിരവധി സൂപ്പർ ഹിറ്റ് ഗാനങ്ങൾ ആലപിച്ച സഞ്ജിത് ഹെഗ്‌ഡെ ആദ്യമായി ഒരു മലയാള ചിത്രത്തിനായി ആലപിക്കുന്നു എന്ന പ്രത്യേകതയുണ്ട്. അടുത്തിടെ ഇന്ത്യയൊട്ടാകെ തരംഗമായ സത്യഭാമ എന്ന കവർ സോംഗിലൂടെ മലയാളികൾക്കും സഞ്ജിത് ഹെഡ്‌ഡെ കൂടുതൽ പരിചിതനാണ്. പ്രേമലുവിലെ കുട്ടി കൂടിയേ എന്ന് തുടങ്ങുന്ന ഗാനം രചിച്ചത് സുഹൈൽ കോയയും സംഗീതം വിഷ്ണു വിജയ്‌യുമാണ്. ഹൈദരാബാദിന്റെ പശ്ചാത്തലത്തിൽ ഒരുങ്ങുന്ന ചിത്രത്തിൽ ശ്യാം മോഹൻ, അഖില ഭാർഗവൻ, അൽത്താഫ് സലിം, മീനാക്ഷി രവീന്ദ്രൻ എന്നിവരാണ് മറ്റു താരങ്ങൾ. ഗിരീഷ് എ.ഡിയും കിരൺ ജോസിയും ചേർന്നാണ് രചന. ഛായാഗ്രഹണം അജ്‌മൽ സാബു. ഭാവന സ്റ്റുഡിയോസിന്റെ ബാനറിൽ ദിലീഷ് പോത്തൻ, ഫഹദ് ഫാസിൽ, ശ്യാംപുഷ്കരൻ എന്നിവർ ചേർന്നാണ് നിർമ്മാണം. ഫെബ്രുവരിയിൽ ചിത്രം റിലീസ് ചെയ്യും.