തിരുവനന്തപുരം: ഒരു മാസത്തിനിടെ പൊതുവിപണിയിൽ വെളുത്തുള്ളിക്ക് കൂടിയത് കിലോയ്‌ക്ക് 90 രൂപ. ചില്ലറ വില 300 രൂപ വരെയായി. പത്തുവർഷത്തിനിടെ ഉണ്ടായ ഏറ്റവും ഉയർന്ന വില. 2022 ഡിസംബറിൽ 65 രൂപയായിരുന്ന വില ഇക്കഴിഞ്ഞ ഡിസംബർ ആദ്യവാരം 210ലെത്തിയിരുന്നു.

മൊത്തവ്യാപാര കേന്ദ്രങ്ങളിൽ 240 രൂപവരെയാണ് ഇപ്പോൾ കിലോയ്‌ക്ക് വില. ആവശ്യത്തിന് ലോഡ് എത്താതായതോടെ വില അനുദിനം വർദ്ധിക്കുകയാണ്. ഗുജറാത്ത്, മഹാരാഷ്ട്ര, രാജസ്ഥാൻ, മദ്ധ്യപ്രദേശ് എന്നിവിടങ്ങളിൽ നിന്നാണ് കേരളത്തിൽ വെളുത്തുള്ളി എത്തുന്നത്. കാലാവസ്ഥ വ്യതിയാനം കാരണം ഉത്പാദനം കുറഞ്ഞതാണ് പ്രതിസന്ധിക്ക് കാരണം. വരൾച്ചയും കാലംതെറ്റിയ മഴയും കൃഷിയെ കാര്യമായി ബാധിച്ചതായി കച്ചവടക്കാർ പറയുന്നു.
അടുത്ത വിളവെടുപ്പുവരെ പ്രതിസന്ധി തുടരുമെന്നാണ് നിഗമനം.

അച്ചാർ ഉത്പാദനം പ്രതിസന്ധിയിൽ

വെളുത്തുള്ളിക്ക് വില കുത്തനെ കൂടിയതോടെ അച്ചാർ നിർമ്മാണ കമ്പനികൾ പലതും ഉത്പാദനം നിറുത്തി. വെളുത്തുള്ളിയുടെ വിലയ്ക്ക് അനുസരിച്ച് അച്ചാർ വിലയും വർദ്ധിപ്പിച്ചാൽ കച്ചവടത്തെ ബാധിക്കുമെന്ന് ഉത്പാദകർ പറയുന്നു.

ഇന്നലത്തെ വില

(കിലോയ്ക്ക്)

പൊതുവിപണി................................ 300

(സെക്കൻഡ് ക്വാളിറ്റി 270)

ഹോർട്ടികോർപ്പ്/സപ്ലൈകോ.........195