തിരുവനന്തപുരം: ഈ വർഷത്തെ ഹരിവരാസനം പുരസ്‌കാരത്തിന് തമിഴ് പിന്നണി ഗായകൻ പി.കെ വീരമണി ദാസൻ അർഹനായി. ഒരു ലക്ഷം രൂപയും പ്രശസ്തി പത്രവുമടങ്ങുന്ന പുരസ്കാരം 15 ന് രാവിലെ എട്ട് മണിക്ക് ശബരിമല സന്നിധാനം ഓഡിറ്റോറിയത്തിൽ മന്ത്രി കെ.രാധാകൃഷ്ണൻ സമ്മാനിക്കും.

സർവമത സാഹോദര്യത്തിനും സമഭാവനയ്ക്കുമുള്ള സർഗാത്മക പ്രവർത്തനങ്ങൾ പരിഗണിച്ചാണ് പുരസ്കാരം. കല്ലും മുള്ളും കാലുക്ക് മെത്തെ, മണികണ്ഠ സ്വാമി, ഇരുമുടി, സ്വാമിമാരേ അയ്യപ്പന്മാരേ.... തുടങ്ങി 6000 ത്തോളം ഭക്തിഗാനങ്ങൾ അദ്ദേഹം ആലപിച്ചിട്ടുണ്ട്. 2012ലാണ് സംസ്ഥാന സർക്കാർ ഹരിവരാസനം പുരസ്കാരം ഏർപ്പെടുത്തിയത്. ദേവസ്വം സ്‌പെഷൽ സെക്രട്ടറി എം.ജി രാജമാണിക്യം, ദേവസ്വം കമ്മിഷണർ സി.എൻ.രാമൻ, പ്രൊഫ.പാൽക്കുളങ്ങര കെ.അംബികാ ദേവി എന്നിവരടങ്ങിയ സമിതിയാണ് പുരസ്കാരം നിർണയിച്ചത്.