തിരുവനന്തപുരം: ദേശീയ റോഡ് സുരക്ഷാ വാരാചരണത്തിന്റെ ഭാഗമായി ജില്ലയിലെ മൈ ഭാരത് വോളന്റിയർമാർക്ക് റോഡ് സുരക്ഷ ബോധവത്കരണ പരിശീലനം നൽകി. സംസ്ഥാന കായിക യുവജനകാര്യ സെക്രട്ടറി പ്രണബ് ജ്യോതിനാഥ് പരിപാടി ഉദ്ഘാടനം ചെയ്തു. മോട്ടോർ വാഹന വകുപ്പ്, ട്രാഫിക് പൊലീസ് എന്നിവരുടെ സഹകരണത്തോടെ നെഹ്റു യുവകേന്ദ്രയാണ് സംഘടിപ്പിച്ചത്. കുടപ്പനക്കുന്ന് സിവിൽ സ്റ്റേഷനിൽ നടന്ന പരിപാടിയിൽ ജില്ലയിലെ നൂറോളം വോളന്റിയർമാർ പങ്കെടുത്തു. പരിശീലനം നേടിയ വോളന്റിയർമാരെ 17 വരെ ജില്ലയിലെ വിവിധ ഭാഗങ്ങളിൽ റോഡ് സുരക്ഷാ ബോധവത്കരണത്തിനായി നിയോഗിക്കും. അസിസ്റ്റന്റ് മോട്ടോർ വെഹിക്കിൾ ഇൻസ്‌പെക്ടർ വിജേഷ്.വി റോഡ്സുരക്ഷ, ട്രാഫിക് നിയമങ്ങൾ എന്നിവ സംബന്ധിച്ച ക്ലാസെടുത്തു. എൻ.എസ്.എസ്, എൻ.സി.സി, സ്‌കൗട്ട്സ് ആൻഡ് ഗൈഡ്സ്, യുവജനക്ഷേമ ബോർഡ് വോളന്റിയർമാർ എന്നിവരാണ് മൈ ഭാരത് വോളന്റിയർമാരായി രജിസ്റ്റർ ചെയ്തിട്ടുള്ളത്. 17 വരെയാണ് ദേശീയ റോഡ് സുരക്ഷാ വാരാചരണം. സംസ്ഥാനത്തെ രണ്ടായിരം വോളന്റിയർമാർക്കാണ് പരിശീലനം നൽകുന്നത്. നെഹ്റു യുവകേന്ദ്ര ഡയറക്ടർ എം.അനിൽ കുമാർ, ആർ.ടി.ഒ അജിത് കുമാർ.കെ എന്നിവരും പങ്കെടുത്തു.