കുറവിലങ്ങാട്: മോഷണ കേസിൽ ഒളിവിൽ കഴിഞ്ഞിരുന്ന പ്രതി വർഷങ്ങൾക്ക് ശേഷം പൊലീസ് പിടിയിൽ. ഈരാറ്റുപേട്ട തലപ്പലം വെട്ടിക്കൽ സിയാദ് (38) നെയാണ് കുറവിലങ്ങാട് പൊലീസ് അറസ്റ്റ് ചെയ്തത്. 2016 നവംബർ 22 വെമ്പള്ളി നടുക്കവല മലഞ്ചരക്ക്കടയിലാണ് സംഭവം. കമ്പിപ്പാര ഉപയോഗിച്ച് കട കുത്തിത്തുറന്ന് സൂക്ഷിച്ചിരുന്ന 500 കിലോയോളം വരുന്ന റബർ ഷീറ്റ് മോഷ്ടിച്ച് കടന്നു കളയുകയായിരുന്നു. തുടർന്ന് കുറവിലങ്ങാട് പൊലീസ് കേസെടുത്തു. ഇത്തരത്തിൽ വിവിധ കേസുകളിൽ ഒളിവിൽ കഴിഞ്ഞു വരുന്ന പ്രതികളെ പിടികൂടുന്നതിനുവേണ്ടി ജില്ലാ പൊലീസ് മേധാവി കെ.കാർത്തിക്കിന്റെ നേതൃത്വത്തിൽ അന്വേഷണസംഘം രൂപീകരിച്ചു നടത്തിയ ശാസ്ത്രീയമായ അന്വേഷണത്തിലാണ് ഇയാളെ പിടികൂടിയത്. എസ്.എച്ച്.ഒ ശ്രീജിത്ത്, എസ്.ഐ അനിൽകുമാർ, എ.എസ്.ഐമാരായ അജി, വിനോദ്, ജോസ് എന്നിവരും അന്വേഷണ സംഘത്തിലുണ്ടായിരുന്നു. ഇയാൾ പൊൻകുന്നം, പാലാ, തിടനാട് എന്നീ സ്റ്റേഷനുകളിലെ നിരവധി മോഷണക്കേസുകളിൽ പ്രതിയാണ്. പ്രതിയെ കോടതിയിൽ ഹാജരാക്കി.