കുന്നംകുളം: അടയ്ക്ക മോഷണം പതിവാക്കിയ രണ്ടഗ സംഘത്തെ കുന്നംകുളം പൊലീസ് അറസ്റ്റ് ചെയ്തു. പൊന്നാനി വെളിയംകോട് സ്വദേശി കരിപ്പോട്ടയിൽ വീട്ടിൽ ഷാജഹാൻ (37), വടക്കേക്കാട് കല്ലൂർ സ്വദേശി മാളിയേക്കൽ വീട്ടിൽ സുബി (40) എന്നിവരെയാണ് കുന്നംകുളം സ്റ്റേഷൻ ഹൗസ് ഓഫീസർ യു.കെ.ഷാജഹാൻ, പ്രിൻസിപ്പൽ സബ് ഇൻസ്‌പെക്ടർ മഹേഷ് എന്നിവരുടെ നേതൃത്വത്തിലുള്ള പൊലീസ് സംഘം അറസ്റ്റ് ചെയ്തത്.

കഴിഞ്ഞ ഡിസംബർ ഏഴിനും ഡിസംബർ 23നും കുന്നംകുളം പൊലീസ് സ്റ്റേഷൻ പരിധിയിലെ അക്കിക്കാവ്, കാട്ടകാമ്പാൽ എന്നിവിടങ്ങളിൽ അടക്ക മോഷണം നടന്നിരുന്നു. സംഭവത്തിൽ കാട്ടകാമ്പാൽ സ്രായിക്കടവ് സ്വദേശി പകിടപ്പറമ്പിൽ വീട്ടിൽ വിജയന്റെ വീട്ടിൽ സൂക്ഷിച്ചിരുന്ന 32,000 രൂപ വിലവരുന്ന 80 കിലോ അടയ്ക്ക പ്രതികൾ രാത്രി ഒന്നിനും അഞ്ചിനും ഇടയിൽ മോഷ്ടിച്ചു. അക്കിക്കാവ് സ്വദേശി കൊട്ടാരപ്പാട്ട് വീട്ടിൽ രാജ ചന്ദ്രന്റെ വീട്ടിൽ സൂക്ഷിച്ച 55 കിലോയോളം തൂക്കം വരുന്ന കൊട്ടടക്കയും മോഷ്ടിച്ചു. കുന്നംകുളം പൊലീസ് സി.സി.ടി.വി ക്യാമറകൾ കേന്ദ്രീകരിച്ച് നടത്തിയ അന്വേഷണത്തിലാണ് പ്രതികൾ പിടിയിലായത്. തൃത്താല പൊലീസ് സ്റ്റേഷനിലും സമാന രീതിയിൽ മോഷണം നടത്തിയതിന് കേസുണ്ട്. ജില്ലാ ലഹരി വിരുദ്ധ സ്‌ക്വാഡ് അംഗങ്ങളായ രാകേഷ്, സുദേവ്, ആശിഷ്, ശരത്, സുജിത്ത്, സിവിൽ പൊലീസ് ഓഫീസർ അബീഷ് എന്നിവരടങ്ങുന്ന സംഘമാണ് പ്രതികളെ പിടികൂടിയത്.