പാമ്പാടി: ബാറിലെ ജീവനക്കാരനെ ആക്രമിച്ച് കൊലപ്പെടുത്താൻ ശ്രമിച്ച രണ്ടുപേർ അറസ്റ്റിൽ. പുളിക്കൽ കവല പതിനാലാം മൈൽ പുള്ളിയിൽ ബിനിൽ (28), മണിമല ചുവട്ടടിപ്പാറ തൊട്ടിക്കൽ അരുൺ (27) എന്നിവരെയാണ് പാമ്പാടി പൊലീസ് അറസ്റ്റ് ചെയ്തത്. പാമ്പാടി കാളച്ചന്ത ഭാഗത്ത് പ്രവർത്തിക്കുന്ന ബാറിലാണ് സംഭവം. ബാറിൽ എത്തിയ ഇവർ ഇവിടെ വച്ച് ബഹളം വയ്ക്കുകയും ബാറിലെ കസേരകൾ മറ്റും തല്ലിയൊടിക്കുകയുമായിരുന്നു. ഇത് ബാറിലെ ജീവനക്കാരൻ ചോദ്യം ചെയ്യുകയും ഇവരോട് ഇവിടെനിന്ന് പോകുവാനും പറഞ്ഞു. ഇതിലുള്ള വിരോധം മൂലം ഇവർ സംഘംചേർന്ന് ഇയാളെ മർദ്ദിക്കുകയും, കയ്യിലിരുന്ന ബിയർ കുപ്പി കൊണ്ട് അടിക്കുകയുമായിരുന്നു. തുടർന്ന് ജീവനക്കാരനെ ബാറിലിട്ട് കത്തിച്ചുകളയുമെന്ന് ഭീഷണിപ്പെടുത്തുകയും ചെയ്തു. പരാതിയെ തുടർന്ന് പാമ്പാടി പൊലീസ് കേസെടുത്ത് ഇരുവരെയും പിടികൂടി. ബിനിൽ കറുകച്ചാൽ, ചെങ്ങന്നൂർ, പെരുവന്താനം, പാമ്പാടി, അയർക്കുന്നം എന്നീ സ്റ്റേഷനുകളിലും, അരുൺ പാമ്പാടി, മണിമല എന്നീ സ്റ്റേഷനുകളിലും ക്രിമിനൽ കേസുകളിൽ പ്രതിയാണ്. പാമ്പാടി സ്റ്റേഷൻ എസ്.എച്ച്.ഒ സുവർണ്ണകുമാർ, സി.പി.ഒമാരായ അനൂപ്, മഹേഷ്, രാംകുമാർ എന്നിവർ ചേർന്നാണ് അറസ്റ്റ് ചെയ്തത്. കോടതിയിൽ ഹാജരാക്കിയ ഇരുവരെയും റിമാൻഡ് ചെയ്തു.