കിടങ്ങൂർ: ലൈസൻസോ മറ്റ് അധികാരപത്രമോ ഇല്ലാതെ അനധികൃതമായി പടക്ക നിർമ്മാണം നടത്തിയ മദ്ധ്യവയസ്കൻ അറസ്റ്റിൽ. കിടങ്ങൂർ ചെമ്പിളാവ് തുണ്ടിയിൽ ജോസഫിനെ (അപ്പച്ചൻ- 64) ആണ് കിടങ്ങൂർ പൊലീസ് അറസ്റ്റ് ചെയ്തത്. ഇയാൾ ലൈസൻസോ മറ്റ് അധികാരപത്രമോ ഇല്ലാതെ അനധികൃതമായി ചെമ്പിളാവ് ലക്ഷംവീട് കോളനി ഭാഗത്തുള്ള തന്റെ റബ്ബർ തോട്ടത്തിൽ നിർമ്മിച്ച ഷെഡുകളിലും ഇതിന്റെ വരാന്തയിലുമായി പടക്കങ്ങൾ സൂക്ഷിക്കുകയും നിർമ്മാണം നടത്തുകയുമായിരുന്നു. ഇവിടെനിന്നും വിവിധ ഇനത്തിൽപ്പെട്ട പടക്കങ്ങളും ഇത് നിർമ്മിക്കാൻ ഉപയോഗിക്കുന്ന വെടിമരുന്ന് സാമഗ്രികളും പൊലീസ് കണ്ടെടുത്തു. കിടങ്ങൂർ സ്റ്റേഷൻ എസ്.എച്ച്.ഒ ടി.എസ് റെനീഷ്, എസ്.ഐ മാരായ സുധീർ, ജിനു, സി.പി.ഒമാരായ വിജയരാജ്, സന്തോഷ്, ജിതീഷ്, സന്തോഷ് എന്നിവർ ചേർന്നാണ് അറസ്റ്റ് ചെയ്തത്. ഇയാളെ കോടതിയിൽ ഹാജരാക്കി.