വക്കം: മാതൃസഹോദരി നൽകുന്ന കരുതലും സ്നേഹവും കരുത്തും ഗീതുവിന് പഠനത്തിന് തുണയായി എം.എ സാമ്പത്തിക ശാസ്ത്രത്തിൽ മൂന്നാം റാങ്ക് ഗീതുവിന്. വക്കം ഇറങ്ങുകടവ് തിട്ടയിൽ വീട്ടിൽ ഗീതുവിന്റെ മാതാവ് പ്രസവത്തോടെ മരിച്ചിരുന്നു. അച്ഛനും ഉപേക്ഷിച്ച ഗീതുവിനെ അന്നുമുതൽ വിവാഹംപോലും വേണ്ടെന്നുവച്ച് സംരക്ഷണം നൽകുന്നത് മാതൃസഹോദരി ഗിരിജാകുമാരിയാണ്.

ഗിരിജ തൊണ്ട് തല്ലി കിട്ടുന്ന വരുമാനത്തിലായിരുന്നു ഇരുവരും കഴിഞ്ഞിരുന്നത്. കയർ മേഖല പ്രതിസന്ധിയിലായതോടെ ഗിരിജ വീട്ടുജോലിക്ക് പോവുകയാണ്. ഇതിനിടെ ചെറിയ കൂരയുണ്ടായിരുന്നതും തകർന്നു. ഇവർക്ക് ഗ്രാമപഞ്ചായത്തിൽ നിന്നു വീടിനായി രണ്ട് ലക്ഷം രൂപ അനുവദിച്ചെങ്കിലും നിർമ്മാണസാമഗ്രികൾ സ്ഥലത്തെത്തിക്കാൻ കഴിയാതെ വിഷമിച്ചു. ഗിരിജ ജോലിക്ക് പോകുന്ന വീട്ടിലെ പുളിവിളാകം സ്കൂൾ പ്രഥമാദ്ധ്യാപിക പൊന്നമ്മ ടീച്ചർ നൽകിയ അഞ്ച് ലക്ഷം രൂപയിലാണ് വീട് പൂർത്തീകരിച്ചത്. ടീച്ചറുടെ ബന്ധുക്കളും വ്യക്തികളും സഹായിച്ചാണ് ഗീതുവിന്റെ തുടർ വിദ്യാഭ്യാസം. എസ്.എസ്.എൽ.സി പരീക്ഷയിൽ ഫുൾ എപ്ലസ് നേടിയിരുന്നു. ആറ്റിങ്ങൽ കോളേജിൽ ബി.എയ്ക്കും, എം.എയ്ക്കും റാങ്കും കരസ്ഥമാക്കി. സിവിൽ സർവീസെടുക്കണം. അതാണ് ഗീതുവിന്റെ ആഗ്രഹം.