വിഴിഞ്ഞം: ദക്ഷിണ മേഖലാ കാർഷിക ഗവേഷണ-വിജ്ഞാനവ്യാപന ഉപദേശകസമിതി യോഗവും കർഷക-ശാസ്ത്രജ്ഞ മുഖാമുഖവും ഇന്ന് 9 മുതൽ വെള്ളായണി കാർഷിക കോളേജിൽ നടക്കും. കാർഷിക സർവ്വകലാശാല വൈസ് ചാൻസലർ ഡോ. ബി. അശോകിന്റെ അദ്ധ്യക്ഷതയിൽ കൃഷി വകുപ്പ് ഡയറക്‌ടർ സീറാം സാംബശിവറാവു ഉദ്ഘാടനം ചെയ്യും. കാർഷിക സർവകലാശാല വികസിപ്പിച്ചെടുത്ത പുതിയ സാങ്കേതിക വിദ്യകൾ പരിചയപ്പെടാനും അവസരമുണ്ട്. സംയോജിത കൃഷി സമ്പ്രദായ മാതൃകകൾ, ചെറുധാന്യ കൃഷി, പഴം-പച്ചക്കറികളുടെ വിളവെടുപ്പാനന്തര പരിചരണ മുറകളും മൂല്യവർദ്ധനയും തുടങ്ങിയ വിഷയങ്ങളിൽ വിദഗ്ദ്ധർ നയിക്കുന്ന ക്ലാസുകളോടൊപ്പം സാങ്കേതിക വിദ്യാ പ്രദർശനവും ഒരുക്കിയിട്ടുണ്ട്.