തിരുവനന്തപുരം: തദ്ദേശ സ്ഥാപനങ്ങളിലെ ‌ഹരിതകർമ്മ സേനാംഗങ്ങൾക്ക് കുറഞ്ഞത് 10,​000 രൂപ പ്രതിമാസ വരുമാനം ഉറപ്പുവരുത്തുമെന്ന് മന്ത്രി എം.ബി. രാജേഷ് നിയമസഭയിൽ പറഞ്ഞു. ഇവർക്ക് സുരക്ഷാ ഉപകരണങ്ങളടക്കം നൽകും. കുടുംബശ്രീ വഴി ഇൻസ്പെയർ എന്ന പേരിൽ ആരോഗ്യ ഇൻഷ്വറൻസുണ്ട്. 25,​201 അംഗങ്ങളായിരുന്നതിൽ 12,​600 പേർ പോളിസി പുതുക്കിയിട്ടുണ്ട്. ഒരു ലക്ഷം രൂപ വരെ ചികിത്സാസഹായം ലഭിക്കും. പ്രീമിയം തുകയുടെ പകുതി കുടുംബശ്രീ നൽകും. തദ്ദേശസ്ഥാപനങ്ങളിലെ കണ്ടിജന്റ് ജീവനക്കാർക്ക് മാത്രമായി സ്പെഷ്യൽ റൂൾ തയ്യാറാക്കുന്നത് പുരോഗമിക്കുകയാണെന്നും പി.പി. ചിത്തരഞ്ജന്റെ ശ്രദ്ധക്ഷണിക്കലിന് മന്ത്രി മറുപടി നൽകി.