തിരുവനന്തപുരം: ഉന്നതബിരുദം നേടിയവർക്ക് പോലും ഇംഗ്ലീഷിൽ പ്രാവീണ്യമില്ലാത്തത് മലയാളി വിദ്യാർത്ഥികളുടെ ന്യൂനതയാണെന്ന് സ്‌പീക്കർ എ.എൻ.ഷംസീർ പറഞ്ഞു.

സ്‌കൂൾ കുട്ടികൾക്കിടയിൽ ഇംഗ്ലീഷ് ഭാഷാപ്രാവീണ്യം വർദ്ധിപ്പിക്കുന്നതിനായി ജില്ലാ പഞ്ചായത്ത് നടപ്പിലാക്കുന്ന ഗോടെക് പദ്ധതിയുടെ ഭാഗമായുള്ള ഗ്രാൻഡ് ഫിനാലെ ഉദ്ഘാടനം ചെയ്‌ത് സംസാരിക്കുകയായിരുന്നു അദ്ദേഹം. ന്യൂനത പരിഹരിക്കാൻ സ്‌കൂൾ തലം മുതലുള്ള പരിശീലനം ആവശ്യമാണ്. ഇത്തരമൊരു പദ്ധതി നടപ്പാക്കിയ ജില്ലാ പഞ്ചായത്തിനെ അഭിനന്ദിക്കുന്നതായും സ്‌പീക്കർ പറഞ്ഞു. ഭരണഘടനയുടെ ആമുഖം വായിച്ച് പരിപാടി തുടങ്ങിയത് നല്ല മാതൃകയാണെന്നും അദ്ദേഹം സൂചിപ്പിച്ചു.

ഗ്രാൻഡ് ഫിനാലെയുടെ ഭാഗമായി സംഘടിപ്പിച്ച വിവിധ പരിപാടികളിൽ ഓവറാൾ ചാമ്പ്യന്മാരായ ഗവ.ഗേൾസ് ഹൈസ്‌കൂൾ മലയിൻകീഴിലെയും റണ്ണറപ്പായ പി.എൻ.എം ജി.എച്ച് എസ് എസ് കൂന്തള്ളൂരിലെയും വിദ്യാർത്ഥികൾക്കുള്ള പുരസ്‌കാരവും അദ്ദേഹം വിതരണം ചെയ്‌തു. കുട്ടികളോട് ഇംഗ്ളീഷിൽ സ്‌പീക്കർ ആശവിനിമയം നടത്തി. ജില്ലാ പഞ്ചായത്ത് പ്രസിഡന്റ് ഡി.സുരേഷ് കുമാർ അദ്ധ്യക്ഷനായ ചടങ്ങിൽ വൈസ് പ്രസിഡന്റ് എ.ഷൈലജ ബീഗം,സ്റ്റാൻഡിംഗ് കൗൺസിൽ അദ്ധ്യക്ഷന്മാരായ വി.ആർ.സലൂജ,എസ്.സുനിത,എം.ജലീൽ,വിളപ്പിൽ രാധാകൃഷ്ണൻ,ജില്ലാ പഞ്ചായത്തംഗങ്ങൾ,അദ്ധ്യാപകർ, വിദ്യാർത്ഥികൾ തുടങ്ങിയവരും പങ്കെടുത്തു.