തിരുവനന്തപുരം: നാവികസേനാ മുൻ വൈസ് അഡ്മിറലും ഇലക്ട്രോണിക്‌സ് രംഗത്തെ വിദഗ്ദ്ധനുമാണ് കേരളാ ഇലക്ട്രോണിക്സ് ഡെവലപ്‌മെന്റ് കോർപ്പറേഷൻ (കെൽട്രോൺ) മാനേജിംഗ് ഡയറക്ടറായി നിയമിതനായ ശ്രീകുമാരൻ നായർ.

പുതിയ എം.ഡിയുടെ നിയമനത്തോടെ ഇലക്ട്രോണിക്‌സ് മേഖലയിലെ പ്രഗത്ഭരുടെ കൂട്ടായ നേതൃത്വമാണ് കെൽട്രോണിന് ഉണ്ടാവുക. എറണാകുളം കടവന്ത്ര സ്വദേശിയായ ശ്രീകുമാരൻ നായ‌ർക്ക് നാവികസേനയിൽ 35 വർഷത്തെ സേവന ചരിത്രമുണ്ട്. ചെയർമാൻ,മാനേജിംഗ് ഡയറക്ടർ,എക്സിക്യൂട്ടീവ് ഡയറക്ടർ,ടെക്നിക്കൽ ഡയറക്ടർ എന്നീ സുപ്രധാന പദവികളിൽ രാജ്യത്തെ തന്നെ ഏറ്റവും വിദഗ്ദ്ധരായവരെ നിയമിച്ചതിലൂടെ കെൽട്രോണിനെ ഇന്ത്യയിലെ ഒന്നാംനിര പൊതുമേഖലാ സ്ഥാപനമായി ഉയർത്താനാണ് സർക്കാർ ലക്ഷ്യമിടുന്നതെന്ന് മന്ത്രി പി.രാജീവ് പറഞ്ഞു.

ശ്രീകുമാരൻ നായർക്ക് ഡൽഹി ഐ.ഐ.ടിയിൽ നിന്ന് കമ്മ്യൂണിക്കേഷൻ എൻജിനിയറിംഗിൽ എം.ടെക് ബിരുദവും തിരുച്ചിറപ്പിള്ളി ആർ.ഇ.സിയിൽ നിന്ന് ഇലക്ട്രോണിക്‌സ് ആൻഡ് കമ്മ്യൂണിക്കേഷനിൽ എൻജിനിയറിംഗ് ബിരുദവുമുണ്ട്. കേരളാ പബ്ളിക് എന്റർപ്രൈസസ് (സെലക്ഷനും റിക്രൂട്ട്‌മെന്റും) ബോർഡ് ശുപാർശയുടെ അടിസ്ഥാനത്തിലാണ് നിയമനം.

കെൽട്രോൺ സി.എം.ഡി പദവിയിൽ നിന്ന് ചെയർമാനായി നിയമിക്കപ്പെടുന്ന എൻ.നാരായണ മൂർത്തി രാജ്യത്തെ മുതിർന്ന ശാസ്ത്രജ്ഞരിലൊരാളാണ്. വി.എസ്.എസ്.സിയുടെ പി.എസ്.എൽ.വി,ജി.എസ്.എൽ.വി മിഷനുകളുടെ നേതൃത്വവും വഹിച്ചിട്ടുണ്ട്. ഇന്ത്യൻ ആസ്ട്രനോട്ടിക്കൽ സൊസൈറ്റിയുടെ സ്‌പെയ്സ് ഗോൾഡ് മെഡൽ,ഐ.എസ്.ആർ.ഒയുടെ പെർഫോമൻസ് എക്‌സലൻസ് പുരസ്‌കാരങ്ങളും നേടിയിട്ടുണ്ട്.

കേന്ദ്ര പ്രതിരോധ സ്ഥാപനമായ എൻ.പി.ഒ.എൽ മുൻ ഡയറക്ടറായ ഡോ.എസ്.വിജയൻ പിള്ളയാണ് കെൽട്രോണിന്റെ ടെക്‌നിക്കൽ ഡയറക്ടർ. നാവിക സേനയുമായി ബന്ധപ്പെട്ട നിരവധി പദ്ധതികൾക്ക് നേതൃത്വം നൽകിയതിന്റെ പരിചയ സമ്പത്തുമായാണ് വിജയൻപിള്ളയും കെൽട്രോണിന്റെ ഭാഗമായത്. ഐ.എസ്.ആർ.ഒയുടെ ഔട്ട് സ്റ്റാൻഡിംഗ് സയന്റിസ്റ്റായിരുന്ന എസ്.ഹേമചന്ദ്രനാണ് കെൽട്രോൺ എക്‌സിക്യൂട്ടീവ് ഡയറക്ടർ.

ചന്ദ്രയാൻ ദൗത്യത്തിലും ആദിത്യ എൽ1 ദൗത്യത്തിലുമായി നൂറോളം ഉത്പന്നങ്ങൾ കെൽട്രോൺ നിർമ്മിച്ചുനൽകിയിരുന്നു. നാവികസേനയ്ക്കുള്ള അത്യാധുനിക ഉപകരണങ്ങളും കെൽട്രോൺ നിർമ്മിക്കുന്നുണ്ട്. പൊതുമേഖലയെ സംരക്ഷിക്കുക മാത്രമല്ല, മികവിന്റെ കേന്ദ്രങ്ങളായി മാറ്റാനുമാണ് സർക്കാർ ശ്രമിക്കുന്നതെന്ന് മന്ത്രി പറഞ്ഞു.