മാന്നാർ: ലോക വനിതാദിനമായ ഇന്ന് ചെങ്ങന്നൂരിലെ നവമാദ്ധ്യമ കൂട്ടായ്മയായ 'എന്റെ ചെങ്ങന്നൂർ' വാട്സപ്പ്ഗ്രൂപ്പ് സ്ത്രീകൾക്കായി സൗജന്യ ബസ് യാത്ര ഒരുക്കുന്നു. ചെങ്ങന്നൂർ പുലക്കടവ് മുതൽ ഹരിപ്പാട് മണ്ണാറശാല വരെ ഓടുന്ന അശ്വതി മോട്ടോഴ്സിന്റെ അംബിക ബസിലാണ് സ്ത്രീകൾക്ക് സൗജന്യ യാത്ര ഒരുക്കുന്നത്. അന്നേദിവസം പ്രസ്തുത ബസിന്റെ എല്ലാ ട്രിപ്പിലും കയറുന്ന വനിതകളുടെ ടിക്കറ്റ് തുക വഹിക്കുന്നത് 'എന്റെ ചെങ്ങന്നൂർ' ഗ്രൂപ്പ് ആയിരിക്കും. ചെങ്ങന്നൂർ അസി.മോട്ടോർ വെഹിക്കിൾ ഇൻസ്പെക്ടർ ശ്യാംകുമാർ.എം ചെങ്ങന്നൂർ പ്രൈവറ്റ് ബസ് സ്റ്റാൻഡിൽ രാവിലെ 11ന് സർവീസ് ഫ്ലാഗ് ഓഫ് ചെയ്യും. ആദ്യ ബസ് ടിക്കറ്റ് നൽകി പിങ്ക് പോലീസ് പരിപാടി ഉദ്ഘാടനം ചെയ്യും. ബസിൽ യാത്ര ചെയ്യുന്നവർക്കായി എന്റെ ചെങ്ങന്നൂർ ഗ്രൂപ്പ് സർപ്രൈസ് സമ്മാനങ്ങളും ഒരുക്കിയിട്ടുണ്ട്.2008 മുതൽ ചെങ്ങന്നൂരിൽ പ്രവർത്തിച്ചു വരുന്ന സോഷ്യൽ മീഡിയാ സൗഹൃദ കൂട്ടായ്മയാണ് എന്റെ ചെങ്ങന്നൂർ. 'സേ നോ റ്റു ഹർത്താൽ' പോലെയുള്ള ഒരുപാട് സാമൂഹിക പ്രവർത്തനങ്ങളും സന്നദ്ധ പ്രവർത്തനങ്ങളും നടത്തി ജനങ്ങളുടെ നന്മയ്ക്കായി നിരന്തര ഇടപെടലുകൾ നടത്തിവരുന്ന രജിസ്റ്റേർഡ് സംഘടനയായ എന്റെ ചെങ്ങന്നൂർ ഗ്രൂപ്പിൽ മുന്നൂറിലധികം അംഗങ്ങളുണ്ട്. ജോൺസൺ ഫ്രെയിംസ്, ശ്രീപ്രിയ.വി, ശ്രീരാജ്.വി, ആൽബിൻ പി.മുരളി, രാരി അരീക്കര എന്നിവരടങ്ങിയതാണ് അഡ്മിൻ പാനൽ.