മാന്നാർ : കുട്ടംപേരൂർ സന്തോഷ് ഭവനത്തിൽ അനിൽകുമാറിന്റെ (സുരേഷ് ) തിരോധാനവുമായി ബന്ധപ്പെട്ട് ആക്ഷൻ കൗൺസിൽ രൂപീകരിച്ചു. കുന്നത്തൂർ യു.പി സ്‌കൂളിന് സമീപം ഇന്നലെ വൈകിട്ട് ബ്ലോക്ക് പഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻ ബി.കെ.പ്രസാദിന്റെ അദ്ധ്യക്ഷതയിൽ കൂടിയ ആക്ഷൻ കൗൺസിൽ രൂപീകരണ യോഗത്തിന്റെ ഉദ്ഘാടനം സി.പി.എം മാന്നാർ ഏരിയ സെക്രട്ടറി പ്രൊഫ.പി.ഡി.ശശിധരൻ നിർവഹിച്ചു. ലോക്കൽ കമ്മിറ്റി സെക്രട്ടറി സി.പി സുധാകരൻ സ്വാഗതം പറഞ്ഞു. ബി.കെ. പ്രസാദ് ചെയർമാനായും, ടി.വി രത്നകുമാരി കൺവീനറായും 101 പേരടങ്ങുന്ന ജനറൽ കമ്മിറ്റിയും, 25 പേർ അടങ്ങുന്ന എക്സിക്യൂട്ടീവ് കമ്മിറ്റിയും രൂപീകരിച്ചു. കുന്നത്തൂർ ദേവസ്വം ട്രഷററും എസ്.കെ.വി ഹൈസ്കൂൾ ജീവനക്കാരനുമായിരുന്ന അനിൽകുമാറിനെ മാർച്ച് 10 മുതലാണ് കാണാതായത്. കുടുംബം നൽകിയ പരാതിയിൽ മാന്നാർ പൊലീസ് അന്വേഷണം ആരംഭിച്ചെങ്കിലും നാളിതുവരെ കണ്ടെത്താനായിട്ടില്ല.

സോഷ്യൽ മീഡിയയിൽ വന്ന അപകീർത്തികരമായ പോസ്റ്റിൽ മനം നൊന്താണ് സുരേഷ് നാടുവിട്ടതെന്ന് സംശയം നിലനിൽക്കുന്നുണ്ട്. കുടുംബത്തിന്റെ ഏക ആശ്രയമായ അനിൽകുമാറിനെ എത്രയും വേഗം കണ്ടെത്തണമെന്നും ഈ തിരോധാനത്തിന് കാരണക്കാരായ കുറ്റവാളികളെ നിയമത്തിനു മുമ്പിൽ കൊണ്ടുവരണമെന്നും ആക്ഷൻ കൗൺസിൽ ആവിശ്യപെട്ടു. മുഖ്യമന്ത്രി, ഡി.ജി.പി, തഹസിൽദാർ അടക്കമുള്ളവർക്ക് ആക്ഷൻ കൗൺസിൽ പരാതി നൽകും. മാന്നാർ ഗ്രാമപഞ്ചായത്ത് പ്രസിഡന്റ് ടി.വി രത്നകുമാരി, വൈസ് പ്രസിഡന്റ് സെലീനനൗഷാദ്, ഗ്രാമപഞ്ചായത്ത് അംഗങ്ങളായ സുനിത എബ്രഹാം, സുജാത മനോഹരൻ, അനീഷ് മണ്ണാരേത്ത് എന്നിവരും വിവിധ രാഷ്ട്രീയ സാമൂഹ്യ സാംസ്കാരിക നേതാക്കളായ പി. എൻ ശെൽവരാജ്, പ്രശാന്ത് കുമാർ, കുന്നത്തൂർ ദേവസ്വം ബോർഡ് പ്രസിഡന്റ് സുനിൽ ശ്രദ്ധേയം തുടങ്ങിയവർ യോഗത്തിൽ പങ്കെടുത്തു.