ആലപ്പുഴ: ലോക്സഭ തിരഞ്ഞെടുപ്പിൽ പോസ്റ്റൽ വോട്ട് ചെയ്യുന്നതിനായി 12-ഡി ഫോമുകൾ ബൂത്ത് ലെവൽ ഓഫീസർമാർ (ബി.എൽ. ഒ) നാളെ മുതൽ വിതരണം ചെയ്യും. 85 വയസ്സ് മുകളിൽ പ്രായമുള്ളവർക്കും ഭിന്നശേഷിക്കാരായ വോട്ടർമാർക്കുമാണ് 12-ഡി ഫോമുകൾ നൽകുന്നത്. ഏപ്രിൽ ഒന്നിന് മുമ്പായി 12 -ഡി ഫോമുകൾ പൂരിപ്പിച്ച് നൽകുന്നവർക്കാണ് പോസ്റ്റൽ വോട്ട് ചെയ്യാൻ അവസരം.

പ്രായാധിക്യം കൊണ്ടുള്ള ബുദ്ധിമുട്ടുള്ളവർക്കും ഭിന്നശേഷിക്കാർക്കും പോളിംഗ് കേന്ദ്രത്തിൽ പോകാതെ തന്നെ വോട്ട് ചെയ്യുന്നതിനുള്ള അവസരമുണ്ടാകും. സെക്ടർ ഓഫീസർമാരുടെ നിരീക്ഷണത്തിലാണ് ബി.എൽ.ഒമാർ വീടുകളിൽ ഫോമുകൾ വിതരണം ചെയ്യുന്നത്. അപേക്ഷകൾ പരിശോധിച്ചു വോട്ട് ചെയ്യുന്നവരുടെ പട്ടിക വരണാധികാരി തയ്യാറാക്കും. പോളിംഗ് ഉദ്യോഗസ്ഥർ ഇവരെ സന്ദർശിച്ച് പോസ്റ്റൽ ബാലറ്റ് സുരക്ഷിതമായി നൽകും.

ഒന്നിന് മുമ്പ് തിരികെ നൽകണം

 ഏപ്രിൽ ഒന്നിന് മുമ്പായി പൂരിപ്പിച്ച ഫോമുകൾ തിരികെ നൽകണം

 ഫോമിന്റെ ഒരു പകർപ്പ് രാഷ്ട്രീയ പാർട്ടി പ്രതിനിധികൾക്ക് ലഭ്യമാക്കും

 എത്ര അപേക്ഷകൾ ലഭിച്ചു എന്നതിന്റെ അടിസ്ഥാനത്തിലാണ് ബാലറ്റ് വിതരണം

 ജനുവരി 22ന് പ്രസിദ്ധീകരിച്ച വോട്ടർ പട്ടികയുടെ അടിസ്ഥാനത്തിലാണ് അർഹരെ തിരഞ്ഞെടുക്കുന്നത്.