നീറ്റ്‌ യു.ജി ഓൺലൈൻ അപേക്ഷയിലെ തെറ്റുകൾ തിരുത്താൻ മാർച്ച് 18 മുതൽ 20ന് രാത്രി 11.50 വരെ അവസരം. രജിസ്‌ട്രേഷൻ സമയത്ത് നൽകിയ മൊബൈൽ നമ്പർ, ഇ-മെയിൽ വിലാസം ഒഴികെയുള്ള എല്ലാ ഫീൽഡുകളിലും തിരുത്തലുകൾ നടത്താം. അപ്‌ലോഡ് ചെയ്ത രേഖകൾ ഭേദഗതിചെയ്യാനും ആധാർ റീഓതന്റിക്കേഷൻ നടത്താനും അവസരമുണ്ട്. exams.nta.ac.in/NEET ൽ ഇതിന് അവസരമുണ്ടാകും. ഇതു സംബന്ധിച്ച വിശദവിവരങ്ങൾ വെബ്‌സൈറ്റിൽ മാർച്ച് 13ന് പ്രസിദ്ധീകരിച്ച നോട്ടീസിൽ (അനുബന്ധം ഒന്നിൽ) വ്യക്തമാക്കിയിട്ടുണ്ട്. ജെൻഡർ, കാറ്റഗറി, പി.ഡബ്ല്യു.ഡി സ്റ്റാറ്റസ് എന്നിവയിൽ വരുത്തുന്ന മാറ്റങ്ങൾവഴി അപേക്ഷാഫീസിൽ വർദ്ധനയുണ്ടാകുന്ന പക്ഷം ബാധകമായ അധിക ഫീസ്, ക്രെഡിറ്റ്‌/ ഡെബിറ്റ് കാർഡ്, നെറ്റ് ബാങ്കിംഗ്, യു.പി.ഐ വഴി അടയ്ക്കണം. അതിനുശേഷമേ മാറ്റങ്ങൾ ബാധകമാവൂ. മേയ് അഞ്ചിന് ഉച്ചയ്ക്ക് രണ്ടുമുതൽ വൈകിട്ട് 5.20 വരെയാണ് പരീക്ഷ.