കൊച്ചി: സമുദ്രമത്സ്യ ഗവേഷണത്തിൽ പൊതുജനങ്ങളെ സഹകരിപ്പിക്കാൻ മൊബൈൽ ആപ്പുമായി കേന്ദ്ര സമുദ്രമത്സ്യ ഗവേഷണ സ്ഥാപനം (സി.എം.എഫ്.ആർ.ഐ).

ഇന്ത്യൻ തീരങ്ങളിലെ കടൽ മത്സ്യയിനങ്ങളുടെ സമ്പൂർണ സചിത്ര ഡേറ്റാബേസ് പൊതുജന പങ്കാളിത്തത്തോടെ വികസിപ്പിക്കുന്നതിനാണ് 'മാർലിൻ @ സി.എം.എഫ്.ആർ.ഐ" ആപ്പ് പുറത്തിറക്കിയത്.

മത്സ്യബന്ധനം നടത്തുന്നവർക്കോ, അതുവാങ്ങുന്നവർക്കോ കാണുന്നവർക്കോ മീനുകളുടെ ചിത്രങ്ങളും മറ്റ് വിവരങ്ങളും ആപ്പിൽ അപ്‌ലോഡ് ചെയ്യാം. വിവരങ്ങൾ ഇന്ത്യൻ സമുദ്രാതിർത്തിയിലെ മത്സ്യയിനങ്ങളെ തിരിച്ചറിയാനും മറ്റ് ശാസ്ത്രീയ വിവരശേഖരണത്തിനും സി.എം.എഫ്.ആർ.ഐയെ സഹായിക്കും.. ജിയോ ടാഗിംഗ് ഉള്ളതിനാൽ മത്സ്യയിനങ്ങളുടെ കൃത്യമായ സ്ഥലം രേഖപ്പെടുത്താനാകും. ഇത് മത്സ്യലഭ്യതയുമായി ബന്ധപ്പെട്ട പഠനങ്ങൾ കുറ്റമറ്റതാക്കാൻ സഹായിക്കും.

സ്ഥാപനത്തിലെ ഫിഷറി റിസോഴ്‌സസ് ആൻഡ് അസസ്‌മെന്റ്, ഇക്കണോമിക്‌സ് ആൻഡ് എക്സ്റ്റൻഷൻ വിഭാഗത്തിലെ ഡോ. എൽദോ വർഗീസിന്റെ നേതൃത്വത്തിലാണ് ആപ്പ് വികസിപ്പിച്ചത്.

ഭാവിയിൽ എ.ഐ സഹായത്തോടെ മൊബൈൽ ഫോണിൽ മീനിന്റെ ദൃശ്യം അപ്‌ലോഡ് ചെയ്യുമ്പോൾത്തന്നെ അതിന്റെ സമ്പൂർണ വിവരങ്ങൾ ലഭ്യമാകുന്ന സംവിധാനം വികസിപ്പിക്കുകയാണ് ലക്ഷ്യം.

 ''സമുദ്രസമ്പത്തിന്റെ സംരക്ഷണത്തിൽ താത്പര്യമുള്ളവരെ കോർത്തിണക്കുന്ന പരസ്പരസഹകരണ സംരംഭമാണ് 'മാർലിൻ @സി.എം.എഫ്.ആർ.ഐ'

ഡോ. എ. ഗോപാലകൃഷ്ണൻ,

ഡയറക്ടർ സി.എം.എഫ്.ആർ.ഐ

 ''ലാൻഡിംഗ് സെന്ററുകളിൽ നിന്ന് പകർത്തിയ മീനുകളുടെ ദൃശ്യങ്ങൾ ഉപയോഗിച്ച് തയ്യാറാക്കുന്ന ഡേറ്റാബേസ്, കടൽമീനുകളുടെ ഓരോ ഹാർബറുകളിലെയും ലഭ്യത ഓട്ടോമാറ്റിക് സംവിധാനത്തിലൂടെ മനസിലാക്കാൻ ഭാവിയിൽ സഹായകരമാകും.''

ഡോ. എൽദോ വർഗീസ്